​नेपाली कांग्रेसमा विद्रोह गरी केदार कार्कीलाई मुख्यमन्त्रीमा अघि सारेका कांग्रेसका ८ सांसदहरू हिजोदेखि नै विराटनगरको एक होटलमा बसेका छन् । 

पार्टी संस्थापनबाट सांसदहरु प्रभावित हुन सक्ने भन्दै शेखर पक्षका ८ सांसदलाई हिजोदेखि नै होटलमा राखिएको स्रोतको दाबी छ । कांग्रेसका सांसदसँगै एमालेका पनि केही सांसद होटलमा रहेका छन् ।

होटलमा सांसदलाई राख्ने तयारीको नेतृत्व केदार कार्कीले गरेका छन् । 

एमालेका ३९ सांसदको समर्थनमा कोशी प्रदेशको मुख्यमन्त्रीमा कांग्रेसका केदार कार्कीले मुख्यमन्त्रीमा दाबी गरेका थिए । 

शेखर पक्षका ८ सांसदले विद्रोह गरेपछि कोशी कांग्रेसको कार्यसम्पादन समितिको बैठक आज बस्दैछ । 

पार्टी सभापति शेरबहादुर देउवाले कोशीमा समानुपातिक सांसदलाई फोन गरेर हस्ताक्षर फिर्ता लिन आग्रह गरेका छन् । 

कोशीमा भएको विद्रोहप्रति पार्टीकाे केन्द्रीय समितिले असन्तुष्टि जनाएको छ ।

कोशीमा मुख्यमन्त्रीका लागि दाबी पेस गरेका केदार कार्कीसहित उदयपुरका रामकुमार खत्री, इलामका शमशेर राई र गोविन्द गिरी, मोरङका मानबहादुर लिम्बू, धनकुटाकी इन्दिरा थापा, सुनसरीकी सुनिता गुरुङ र उदयपुरकी लीलाकुमारी राईले कांग्रेसबाट विद्रोह गरेर एमालेको समर्थनमा सरकार बनाउनका लागि हस्ताक्षर गरेका छन् ।