पाल्पामा दुईवटा खोलामा डुबेर मंगलवार दुई जनाको ज्यान गएको छ । पाल्पाको तिनाउ गाउँपालिका–३ मा रहेको तिनाउ खोलाको ड्याममा डुबेर घुम्न आएकी भारतीय युवती महिलाको मृत्यु भएको जिल्ला प्रहरी कार्यालय, पाल्पाका डीएसपी सुगन्ध श्रेष्ठले जानकारी दिए । 

भारतको उत्तरप्रदेश मगहरकापुरको एक विद्यालयका करिब २०–२५ जना शिक्षक र विद्यार्थी नेपालमा घुम्न आएका थिए । घुम्न आएका विद्यार्थीहरूमध्ये २० वर्षीया शाहिस्ता प्रविन फोटो खिच्नेक्रममा अचानक चिप्लिएर खोलामा डुबेकी थिइन् ।

प्रहरी चौकी दोभानबाट खटिएको टोलीले किशोरीको उद्धार गरी उपचारका लागि लुम्बिनी प्रादेशिक अस्पताल बुटवल पठाइएको थियो । अस्पतालमा पुर्याएपछि चिकित्सकले किशोरीलाई मृत घोषणा गरेको थियो । 

यस्तै पाल्पाकै भुतखोलामा घुम्न गएका रुपन्देहीका २२ वर्षीय युवकको डुबेर मृत्यु भएको छ । तिनाउ गाउँपालिका–३ भुतखोलामा डुबेर रुपन्देहीको सिद्धार्थनगर (भैरहवा) नगरपालिका–९ का विमल आचार्यको मृत्यु भएको श्रेष्ठले जानकारी दिए । 

आचार्य भैरहवाकै साथी युना दाहालसँग पाल्पामा घुम्न गएका थिए । भुतखोलामा उनीहरू दुवैजना पुगेको प्रहरीले जनाएको छ । आचार्य र दाहाल दुवैको उद्धार गरी अस्पताल पुर्याइएको थियो । उनीहरु दुई दिदीभाइ नाताका हुन् । अस्पताल पु¥याउँदा चिकित्सकले आचार्यलाई मृत घोषणा गरेका थिए ।

बुटवलदेखि ६ किलोमिटर दूरीमा रहेको भुतखोलामा घुम्न जाने धेरै युवाको हरेक वर्ष डुबेर मृत्यु हुने गरेको छ ।