आगामी २०२४ को लोकसभा निर्वाचनको पूर्वसन्ध्यामा भारतीय प्रधानमन्त्री नरेन्द्र मोदीले पेट्रोलियम पदार्थको मूल्य घटाउने तयारी गरेका छन् ।

भारतीय सञ्चारमाध्यमहरूले आम जनतालाई ठूलो राहत दिने गरी पेट्रोलियम पदार्थको मूल्य भारू ८ देखि १० सम्म कम गर्ने गृहकार्य गरेको खुलासा गरेका हन । सञ्चार संस्था डब्लूआइओनका अनुसार यो वर्षको अन्त्यसम्ममा मोदीले डिजेल र पेट्रोलको मूल्य कम गर्ने घोषणा गर्ने तयारी गरिरहेका छन् ।

भारतमा आगामी वर्ष २०२४ को अप्रिल र मेमा लोकसभा निर्वाचन हुँदैछ । स्रोतको हवाला दिँदै उक्त सञ्चारमाध्यमले भनेको छ, 'पेट्रोलियम मन्त्रालयले मूल्यमा भारि कटौती गर्ने गरी तयारी गरिरहेको छ । उक्त प्रस्ताव प्रधानमन्त्री मोदीले अनुमोदन गरेपछि लागू हुनेछ ।'

विगत २०२२ अप्रिलदेखि भारतमा पेट्रोलियम पदार्थको मूल्य समान छ । चालू आर्थिक वर्षमा भारतीय पेट्रोलियम कम्पनीहरूले कच्चा तेलको प्रशोधन गरेर अर्बौं मुनाफा गरिरहेका छन् । पछिल्लो ६ महिनामा मात्र आइओसी, बीपीसीएल र एचपीसीएल तीन वटै ठूला कम्पनीहरूले ५८ हजार १९८ करोड भारू मुनाफा गरेका छन् ।

भारतको राजधानी नयाँदिल्लीमा पेट्रोलको मूल्य ९६ दशमलव ७२ भारू छ भने राजस्थानमा १०९ दशमलव ३४ भारू छ । त्यस्तै हरियाणामा ९७ दशमलव ३१, युपीमा ९७ दशमलव ०५, पन्जाबमा ९८ दशमलव ४५ भारू रहेको छ ।

यदि पेट्रोलियम पदार्थको मूल्यमा ८ देखि १० भारू कटौती भयो भने आम जनतालाई ठूलो राहत हुने र निर्वाचनको नतिजा आफ्नो पक्षमा पर्ने प्रधानमन्त्री मोदी र उनीसम्बद्ध पार्टी भारतीय जनता पार्टी (बीजेपी)को रणनीति रहेको भारतीय सञ्चारमाध्यमहरूको दाबी छ ।