नेपाली कांग्रेसका महामन्त्री गगन थापाले ललितपुरको बालकुमारीमा मन्त्रीको लापरबाहीले दुई जनाको मृत्यु भएको दाबी गरेका छन् ।

राज्य व्यवस्था तथा सुशासन समितिको सोमवार बसेको बैठकमा महामन्त्री थापाले दुई जना युवाको निहत्था रुपमा ज्यान गएको बताए ।

'त्यहाँ प्रदर्शन भइरहेको छ भन्ने थाहा पाउँदा पाउँदै मन्त्री जानु जबर्जस्ती हो, चरम लापरबाही हो । मन्त्रीकै लापरबाहीकै कारणले ठूलो दुर्घटना भयो । दुई जना ज्यान गयो', समिति बैठकमा बोल्दै थापाले भने ।

घटनाको छानबिन गर्न बनेको समितिको प्रतिवेदन कार्यान्वयन हुनुपर्ने उनको भनाइ छ ।

‘सरकारले आज न्यायिक समिति बनायो। हाम्रो पार्टीको तर्फबाट माग नै त्यही थियो। समितिको काम छैन, जिम्मेवार राजनीतिक नैतिकता राजीनामा दिनुपर्छ भन्ने कुरा आयो। न्यायिक छानबिन गर्ने भनेपछि कसरी टुंगिन्छ त्यो हेर्नुपर्छ। पूर्व न्यायाधीशको नेतृत्वमा छ’, उनले भने, ‘यो समिति जसले बनाएको छ, निर्णय उसले नै कार्यान्वयन गर्नुपर्ने हुन्छ।’