वन तथा वातावरण मन्त्रालयका सचिव दीपककुमार खरालले आफ्नै मन्त्रालयका मन्त्री वीरेन्द्र महतोले लगाएको आरोपको जवाफ फर्काएका छन् ।

मन्त्रालयमा मंगलवार दिउँसो सञ्चारकर्मीको प्रश्नको जवाफ दिँदै उनले वन तथा वातावरणमन्त्री महतोले कर्मचारीलाई टेरेनन् भन्ने आरोपको जवाफ फर्काएका हुन् ।

बूढानीलकण्ठमा निर्माण गरिएको ‘होटल फरेस्ट इन’सम्बन्धी फाइल अगाडि नबढेपछि आक्रोशित बन्दै मन्त्रालय पुगेका नेपाली कांग्रेसका सांसद दीपक खड्कालाई सम्बोधन गर्ने क्रममा वनमन्त्री महतोले कर्मचारीले आफूलाई नटेरेको बताएका थिए । त्यसैको जवाफ दिँदै सचिव खरालले मन्त्री र प्रधानमन्त्रीले कानूनसम्मत दिएका निर्देशन आफूहरूले पालना गरेको बताएका छन् । 

कानूनमा अस्पष्टता भएमा कसैको निर्देशन पनि मान्न नसकिने उनले स्पष्ट पारेका हुन् ।

‘कर्मचारीलाई काम गर्न विधि, प्रक्रिया, मापदण्ड र ऐन–नियम चाहिन्छ । त्यो स्पष्ट भएको खण्डमा काम अघि बढाउन सकिन्छ । अस्पष्ट भएमा अगाडि बढाउन सकिँदैन । हामीले गरेका प्रक्रिया कामसम्मत छैनन् भने प्रश्न उठाउने हो र काम गरेका छौं भने सराहना गर्नुपर्छ,’ सचिव खरालले भने, ‘भएका विधि प्रक्रियाअनुसार काम अघि बढाइरहेका छौं । मन्त्री र प्रधानमन्त्रीका निर्देशनलाई  कानूनसम्मत भएका नगरेको भने पटक्कै छैन ।’

सो अवसरमा उनले कांग्रेस सांसद खड्का कसैलाई हातपात गर्न मन्त्रालय नआएको स्पष्ट पारेका छन् । ‘माननीयज्यूूले सदासायताका साथ भन्नुभयो– सचिवज्यू आज टुंगो लगानुपर्छ,’ उनले थपे । 

सचिव खरालले शिवपुरी राष्ट्रिय निकुञ्ज रहेको मध्यवर्ती क्षेत्रमा व्यावसायिक होटल स्थापनाका लागि सांसद खड्का ४ वर्षदेखि प्रयासरत रहेको पाइएको जानकारी दिँदै तर कानूनी प्रक्रिया नपुर्याएकाले फाइल अड्किएको स्पष्ट पारे ।

मध्यवर्ती क्षेत्रमा व्यावसायिक होटल खोल्न सांसद खड्काले उद्योग सञ्चालक समिति र ईआईएको मापदण्ड पनि नपुर्याएकाले उनलाई ५ लाख रुपैयाँ जरिवाना गराइएको सचिव खरालको भनाइ छ ।

‘सो क्षेत्रमा साढे २ तलाभन्दा माथिको होटल खोल्न नपाउने भन्ने रहेछ । सांसद खड्काले मान्यताअनुसार स्वीकृत नलिएको पाइएको छ । कानूनले तोकबमोजिम नभएकाले उहाँहरूलाई दण्ड जरिवाना गरिएको हो,’ उनले थपे, कानून बमोजिमका मापदण्ड, विधि र प्रक्रियाअनुसार जानै पर्यो । राष्ट्रिय निकुञ्ज ऐन र मध्यवर्ती क्षेत्रको नियमावली त पूरा गर्नु पर्यो नि !’ 

यसअघि बूढानीलकण्ठमा निर्माण गरिएको ‘होटल फरेस्ट इन’सम्बन्धी फाइल अगाडि नबढेपछि आक्रोशित बन्दै मन्त्रालय पुगेका कांग्रेसका सांसद खड्कालाई वन तथा वातावरणमन्त्री मन्त्री महतोले जवाफ फर्काएका छन् ।

मंगलवार दिउँसो नै मन्त्रालयमा सञ्चारकर्मीका प्रश्नको जवाफ दिँदै उनले आफ्ना कारण होटल निर्माणको फाइल नरोकिएको स्पष्ट पारेका थिए ।

मन्त्री महतोले ऐन–कानूनमा समस्यासँगै कर्मचारीको पनि अटेरीका कारण उक्त फाइल अड्किएको बताएका थिए । त्यसैको जवाफ सचिव खरालले मन्त्रीलाई दिएका हुन् । 

कांग्रेस सांसद खड्का धर्ना दिन आएपछि मन्त्री महतोले भने– कर्मचारीले टेरेनन्, के म पिट्न जानु ?