​जापान एयरलाइन्सको विमान मंगलवार साँझ टोकियोको हानेडा विमानस्थलको धावनमार्गमा अवतरणका क्रममा आगलागी भएको छ ।

बीबीसीले त्यहाँको स्थानीय सञ्चारमाध्यम एनएचकेको हवाला दिँदै विमानको झ्यालबाट र त्यसको मुनि आगो निस्किरहेको बताएको छ । धावनमार्ग पनि आगोले उज्यालो देखिएको थियो ।​

सपोरोबाट उडेको विमान तटरक्षकको विमानसँग ठोक्किएको त्यहाँका अधिकारीहरूलाई उद्धृत गर्दै एनएचके ले जनाएको बीबीसीले समाचार प्रकाशित गरेको छ ।

विमानमा रहेका सबै ३७९ यात्रु र चालक दलका सदस्यलाई बाहिर निकालिएको छ ।

'हामी क्षतिको मूल्याङ्कन गरिरहेका छौं,' एयरलाइन्सका एक अधिकारीले भने । 

जापान एयरलाइन्सको फ्लाइट ५१६ को विमान स्थानीय समय ४ बजे नयाँ चितोसे विमानस्थलबाट प्रस्थान गरेको थियो र ५ बजेर ४० मिनेटमा हानेडामा अवतरण गर्ने तालिका थियो।

टीभी फुटेजमा विमानबाट धुवाँ र आगो निस्किरहेको देखिन्छ ।