प्रधानमन्त्री तथा मन्त्रिपरिषद् कार्यालयअगाडि अर्धनग्न प्रदर्शन भएपछि देशको प्रमुख प्रशासनिक केन्द्र सिंहदरबार प्रवेशमा कडाइ गरिएको छ । सिंहदरबार प्रवेश गर्नेलाई बुधवारदेखि कडाइ गरिएको हो । दक्षिण ढोकाबाट पैदल हिँडेर सिंहदरबार प्रवेश गर्नेलाई विगतमा भन्दा कडाइ गरिएको हो । 

सिंहदरबार पस्नेलाई गेटमा मेटल डिटेक्टरसहित सुरक्षा जाँच गर्न लागिएको छ । सिंहदरबार प्रवेश गर्ने पासमा समेत कडाइ गरिएको एक अधिकारीले जानकारी दिए । सिंहदरवार प्रवेश गर्नेहरूले पनि सुरक्षा जाँच कडा बनाइएको प्रतिक्रिया दिए । 

सरकारी कर्मचारी, सुरक्षाकर्मी र सूचना विभागको प्रवेश पास भएका पत्रकार बाहेकले सिंहदरबार प्रवेश गर्न त्यहाँ भित्रका कुनै मन्त्रालय या कार्यालयको पास लिनुपर्ने हुन्छ । मन्त्री–सांसदलाई भेट्न जाने आगन्तुकले नागरिकता प्रमाणपत्रको आधारमा अस्थायी पास पाउने गरेका छन् । 

यसरी पास लिएर सिंहदरबार प्रवेश गर्नेलाई कडाइ गर्न लागिएको हो । सोमवार मोहन वैद्य नेतृत्वको क्रान्तिकारी कम्युनिस्ट पार्टीका कार्यकर्ताले प्रधानमन्त्री कार्यालयअगाडि अर्धनग्न प्रदर्शन गरेपछि सिंहदरबार प्रवेशमा कडाइ गरिएको हो । वैद्यका कार्यकर्ता आगन्तुक बनेर सिंहदरबार प्रवेश गरेका थिए । 

सिंहदरबार सुरक्षा गणका डीएसपी सन्तोष तामाङले सुरक्षा व्यवस्था चुस्त बनाइएको जानकारी दिए । ‘सिंहदरबारभित्रै अवाञ्छित प्रदर्शन भएपछि सुरक्षा व्यवस्था कडा गरेका छौं,’ तामाङले लोकान्तरसँग भने । 

राजनीतिक दलका बेरोजगार कार्यकर्ताले विभिन्न मन्त्रालय, संसदीय दलको कार्यालय या अन्य सरकारी कार्यालयबाट पास मगाएर सिंहदरबार जाने गरेका छन् । कार्यकर्ताको भीडले काम गर्न अप्ठेरो भएको कतिपय मन्त्रीहरूले गुनासो गर्ने गरेका छन् ।