अष्ट्रेलियाका क्रिकेटर डेबिट वार्नर बिग ब्यास लिग (बीबीएल) खेल्न हेलिकप्टर लिएर मैदानमै पुगेका छन् ।

सिड्नी थन्डर्समा आवद्ध उनी हेलिकोप्टर चढेर शुक्रवार खेल मैदानमै पुगेका हुन् । उनी आवद्ध सिड्नी थन्डर्स टोलीले शुक्रवार नै सिड्नी सिक्सर्सको सामना गरेको थियो । उक्त खेलमा सहभागी हुन वार्नर हेलिकप्टरबाट मैदानमा ओर्लिएलगत्तै उनलाई स्वागत गर्न केही मानिस आएका थिए । दर्शकहरूले ताली बजाएका थिए ।

उनी अष्ट्रेलियाको सिड्नी शहरकै उत्तरी क्षेत्रमा भएको आफ्नै भाइको विवाह सकेर सिक्सर्सविरुद्ध खेल्न हतारमा हेलिकप्टरमार्फत आएको बताइएको छ ।​

सिड्नी क्रिकेट मैदानमा भएको उक्त खेलमा वार्नरले ३७ बलमा ३९ रन बनाए पनि दुर्भाग्यवश वार्नरको टोली थन्डर्स पराजित भएको छ ।

वार्नरले गत सातामात्रै आफ्नो खेल जीवनको सम्भवत अन्तिम अन्तर्राष्ट्रिय खेल खेलेका थिए । सो खेलमा उनले पाकिस्तानविरुद्धको टेस्टमा अर्धशतक बनाएका थिए । 

३७ वर्षीय वार्नरले यसअघि नै एकदिवसीय क्रिकेटबाट सन्यास लिइसकेका छन् । तर अष्ट्रेलियन राष्ट्रिय टोलीले आवश्यकता महसुस गरेमा आफूले सन्यास फिर्ता लिनसक्ने पनि उनले स्पष्ट पारेका छन् ।

वार्नरसहितको अष्ट्रेलियन टोलीले सन् २०२१–२३ मा विश्व टेस्ट च्याम्पियनसिप जितेको थियो । यस्तै उनका नाममा २ वटा एकदिवसीय र एउटा टी–२० विश्वकप पनि छन् ।

गत नोभेम्बरमा मात्रै वार्नरसहितको टोलीले भारतलाई उसकै घरेलु मैदानमा हराएर छैटौं पटक एकदिवसीय विश्वकपको उपाधि जितेको थियो ।