एएफसी एसियन कप फूटबल प्रतियोगितामा छिमेकी देश भारत बलियो अस्ट्रेलियासँग पराजित भएको छ ।

शनिवार कतारको बिन अली रंगशालामा भएको खेलमा अस्ट्रेलियाले भारतलाई २–० गोलले हराएको हो ।

समूह ‘बी’को यो खेलको पहिलो हाफमा भारतले अष्ट्रेलियालाई गोलरहित बराबरीमा रोक्न सफल भएको थियो । तर दोस्रो हाफमा अस्ट्रेलियाले दुवै गोल गर्दै सहज जीत निकालेको हो ।  

अस्ट्रेलियाका लागि ज्याकसन इर्भिनले ५०औं मिनेटमा पहिलो गोल गरे भने जोर्डन बोसले ७३ औं मिनेटमा अग्रता दोब्बर बनाए ।

जीतसँगै समूहको शीर्ष स्थानमा रहेको अष्ट्रेलियाले ३ अंक जोडेको छ ।

भारत र अष्ट्रेलियाको समूहमा उज्वेकिस्तान र सिरिया पनि छन् । 

यसअघि शुक्रबार राति भएको उद्घाटन खेलमा आयोजक कतारले लेवनानलाई ३–० गोलले पराजित गरेको थियो । 

एसियन कप एसियाको सबैभन्दा ठूलो फूटबल प्रतियोगिता हाे ।