नेपाल चिया विकास निगम लिमिटेड अन्तर्राष्ट्रिय पुरस्कारबाट सम्मानित भएको छ ।

नारायणी नदी किनारमा आयोजित नेपालमा उत्पादित चियाहरूको वृहत् प्रदर्शनी तथा टी टेस्टिङ्ग कार्यक्रममा लिमिटेडको ‘कन्याम चिया बगान’ २०२३ को उत्कृष्ट बन्दै गोल्ड विजेता बन्न सफल भएको हो । 

आठौं एसिया टी कम्पिटिसन २०२३ को चिया गुणस्तरमा ‘कन्याम चिया बगान’ गोल्ड विजेता बनेको हो ।

उक्त प्रदर्शनी नेपाल चिया तथा कफी विकास बोर्डको आयोजना तथा उद्योग वाणिज्य संघ चितवन, होटल व्यवसायी संघ चितवन तथा भरतपुर महानगरपालिकाको सह–आयोजनामा यही माघ २६ र २७ गते भएको थियो ।

मेलामा चिया क्षेत्रमा क्रियाशील विभिन्न संघ संस्थाको सहभागिता तथा विभिन्न चिया उत्पादक कम्पनीहरूले आफ्नो उत्पादनको प्रदर्शन गरेका थिए ।

उक्त प्रदर्शनीको उद्घाटन कृषि तथा पशुपंक्षी विकास मन्त्री डा. बेदुराम भुषालले गरेका थिए । साथै नेपाल चिया विकास निगमका कार्यकारी अध्यक्ष सुभाषचन्द्र संघईलाई मन्त्री भुषालले सम्मान पत्र प्रदान गरेका थिए ।

हरेक वर्ष चीनमा विश्वभरिका १७ चिया उत्पादन गर्ने देशहरूबीच हुने यस प्रतियोगितामा नेपालको तर्फबाट नेपाल चिया विकास निगमले सहभागिता जनाएको थियो ।

निगमका झापा र इलाममा ७ वटा चिया बगानहरू छन् । साथै निगमले नेपालीहरू माझ लोकप्रिय तथा अन्तर्राष्ट्रिय स्तर मै चिर–परिचित टोकला चियाको उत्पादन तथा बिक्री वितरण गरिरहेको छ ।

कम्पनीका अनुसार यस पुरस्कारले नेपाली चियालाई अन्तर्राष्ट्रिय बजारमा थप चिनाउन र प्रवर्द्धन गर्न ठूलो टेवा पुगेको छ ।