​​नेपाल ट्रेड युनियन महासंघ (जिफन्ट)ले  प्रत्येक वर्ष फागुन २१ गतेलाई 'नेपाली ट्रेड युनियन आन्दोलन स्थापना दिवस'का रुपमा मनाउने घोषणा गरेको छ ।​​​​​

पुतलीसडकस्थित केन्द्रीय कार्यालयमा आइतवार आयोजित पत्रकार सम्मेलनमार्फत जिफन्टले यस्तो घोषणा गरेको हो ।​​​

जिफन्ट अध्यक्ष विनोद श्रेष्ठले पछिल्लो समयका आन्दोलनहरू राजनीतिक अभीष्ट पूरा गर्ने माध्यम बन्दै गएको बताए ।

२००३ साल फागुन २१ गते तत्कालीन वामपन्थी नेता मनमोहन अधिकारी र नेपाली काङ्ग्रेसका नेता गिरिजाप्रसाद कोइरालाको अगुवाइमा नेपालमा ट्रेड युनियन आन्दोलनको प्रारम्भ भएको उनले स्मरण गरे ।

'ट्रेड युनियन आन्दोलन वर्गीय हो । तर यसलाई राजनीतिक हिसाबले विभाजित गरिँदैछ', श्रेष्ठले पत्रकार सम्मेलनमा भने ।

पछिल्लो समय ट्रेड युनियन आन्दोलन कमजोर बन्दै गएको स्वीकार्दै अध्यक्ष श्रेष्ठले यसको दोष वर्तमान सत्ता गठबन्धन भएको दाबी गरे ।

नेपालको ट्रेड युनियन आन्दोलनलाई कमजोर बनाउन अहिलेको सत्ता गठबन्धनले नक्कली ट्रेड युनियनहरू खडा गरेको जिफन्टले जनाएको छ । जसका कारण वास्तविक श्रमिक वर्गको मुद्दा ओझेलमा परेको उनले बताए ।

'योगदानमा आधारित सामाजिक सुरक्षालाई फितलो बनाउने प्रयत्न भइरहेको छ', अध्यक्ष श्रेष्ठले पत्रकार भेटघाटमा भने । उनले वैदेशिक रोजगारीलाई युवाहरूमा बाध्यात्मक बन्दै जानु ट्रेड युनियनहरू माथिको प्रहारको परिणाम भएको दाबी गरे । ​

श्रमजीवी वर्गका सबै समस्यालाई समाधान गर्दै सुमधुर श्रम सम्बन्ध, औद्योगिक शान्ति र श्रमिकको सामाजिक आर्थिक रुपान्तरणमा लाग्न आफूहरू प्रतिबद्ध रहेको बताउँदै जिफन्टले अब हरेक वर्ष फागुन २१ गतेको दिनलाई मजदुरहरूको महान चाडको रुपमा मनाउने घोषणा पत्रकार सम्मेलनमा गरेको छ ।​

जिफन्ट महासचिव लक्ष्मण शर्माका अनुसार भोलि २१ गते पूर्वप्रधानमन्त्री एवं नेकपा (एमाले) अध्यक्ष केपी शर्मा ओलीले ७७ औं वार्षिकोत्सव समारोहको उद्घाटन गर्ने छन् ।

समारोहमा विभिन्न १६ देशका ट्रेड युनियन प्रतिनिधिहरूले भाग लिने उनले जानकारी दिए ।