पश्चिम नवलपरासीमा आफ्नै मृत्यु दर्ता प्रमाणपत्र बनाउने एक व्यक्तिलाई प्रहरीले पक्राउ गरेको छ । 

वडा कार्यालय र जिल्ला प्रहरी कार्यालयको नक्कली लेटर प्याड र छाप प्रयोग गरी कीर्ते मृत्यु प्रमाणपत्र बनाउने रुपन्देहीको रोहिणी गाउँपालिका–४ छिपागढ घर भएका ४४ वर्षीय शिवनारायण सिंह पक्राउ परेका हुन् ।

उनलाई हालै पक्राउ गरिएको जिल्ला प्रहरी कार्यालय, नवलपरासीका सूचना अधिकारी प्रहरी निरीक्षक (इन्स्पेक्टर) सुदर्शन पन्थीले बिहीवार जानकारी दिए । 

तान्त्रिक विद्या सिकाउने र झारफुकसमेत गर्दै आएका सिंह विगत ३ वर्षदेखि नवलपरासी बर्दघाट नगरपालिका–१४ गंगाबस्तीस्थित गंगा माविअगाडि कान्छी श्रीमतीसँगै क्यान्टिन सञ्चालन गर्दै आएका थिए ।

उनले आफू जिउँदो छँदै उनले २०६९ माघ ५ गते कालगतीले मृत्यु भएको कीर्ते प्रमाण बनाएको प्रहरीको दाबी छ । ‘२०६९ माघ ५ गते शिवनारायण सिंहको असामयिक निधन भएकाले उक्त विवरण प्रमाणित गरिन्छ,’ रोहिणी गाउँपालिका–४ का वडाध्यक्ष तारानाथ यादवको कीर्ते हस्ताक्षर प्रयोग गरी बनाइएको नक्कली प्रमाणपत्रमा उल्लेख छ । 

त्यस्तै सिंहले जिल्ला प्रहरी कार्यालय रुपन्देहीको नक्कली लेटर प्याड बनाएर आफ्नो मृत्यु भएको कीर्ते सतगत पुर्जीसमेत बनाएको सूचना अधिकारी पन्थीले बताए । कीर्ते कागजपत्र बनाएर राखेको भन्ने सूचनाका आधारमा उनी बसोबाससमेत गर्दै आएको क्यान्टिनमा खानतलासी गर्दा उक्त कागजात फेला परेको पन्थीले जानकारी दिए । 

प्रहरी अभिलेखअनुसार उनी २०६४ सालमा नवलपरासीबाट हातहतियार खरखजना मुद्दामा थुनामा परी सजाय काटेको देखिएको छ । लामो समयदेखि उनी भारतमा रोजगारी गरेर फर्केको प्रहरीले जनाएको छ । 

कीर्ते मृत्यु प्रमाणपत्र बनाउनुको कारणबारे सिंहले प्रहरीसमक्ष केही बताएका छैनन् । भारतमा लामो समयदेखि काम गरेका कारण त्यहाँ कुनै आपराधिक कृयाकलाप गरेको हुन सक्ने र त्यहाँ रहेको प्रमाणलाई नष्ट गराउने उद्देश्यले उक्त कागज बनाएको हुन सक्ने प्रहरीले अनुमान गरेको छ । 

पक्राउ परेका सिंहलाई लिखितसम्बन्धी कसुरमा मुद्दा प्रक्रिया अघि बढाइएको सूचना अधिकारी पन्थीले जानकारी दिए ।