नेपाल टेलिकमले आफ्ना ग्राहकका लागि उपलब्ध गराएको अडियो सूचना बोर्ड प्रभावकारी बन्दै गएको  छ । विगत केही समय यता यो सेवा लिने ग्राहकको संख्यामा उल्ल्लेख्य वृद्धि भएको टेलिकमको दाबी छ ।

नेपाल टेलिकमका ग्राहकले नेपाल टेलिकमको मोबाइल/ल्यान्डलाइन या भीस्याट टेलिफोन प्रयोग गरेर आफ्नो सूचना वा जानकारी आफ्नो सूचना बोर्ड नम्बरमा रेकर्ड गर्न सक्छन् । 

अडियो सूचना बोर्ड नेपाल टेलिकमले आफ्ना ग्राहकहरूका लागि ल्याएको नि:शुल्क सेवा हो । यो सेवाले ग्राहकहरूलाई सूचना बोर्ड नम्बरमा जानकारीको रेकर्ड गर्न अनुमति दिन्छ । रेकर्डिङपछि त्यसलाई नियमित अद्यावधिक गर्न पनि मिल्छ भने त्यो हटाउन पनि मिल्छ ।

कुनै मोबाइल/ल्यान्डलाइन र भीस्याट नम्बरमा कल गरेर त्यहाँको सूचना लिन प्रयोग गरिने सेवा नै अडियो नोटिस बोर्ड सेवा हो । रेकर्ड गरिएका सूचनाहरू र जानकारीहरू सजिलै सम्पादन गर्न वा ग्राहकले आवश्यकता अनुसार मेटाउन सक्नेछन् ।

नेपाल टेलिकमले यो सेवा निशुल्क दर्ता हुने जनाएको छ भने ग्राहकले नयाँ उपकरण थप्न आवश्यक हुँदैन । ल्यान्डलाइन भएका वा ल्यान्डलाइन नभएका जो कोहीले पनि यसको सेवा लिन सक्ने टेलिकमको दाबी छ ।

यसरी रेकर्ड गरिएका सूचनाहरू सेवाग्राहीले रेकर्ड गर्न, सम्पादन गर्न र मेटाउनसमेत सक्नेछन् ।

यी सूचनाहरू पासवर्ड राखेर सुरक्षित गर्न सकिने र सेवाग्राहीबाहेक अन्य कसैले पनि अपलोड गरिएको सूचना सम्पादन या मेटाउन नमिल्ने टेलिकमले जनाएको छ । यस्तो सूचना १ देखि ३ मिनेटसम्म लामो राख्न सकिन्छ ।

सामान्य र आपतकालीन सूचनाहरूको लागि स्कूल/कलेजहरूले यसको प्रयोग गर्न सक्नेछन् । त्यस्तै उत्पादनको जानकारी, विज्ञापन, आदि उद्देश्यका लागि यो सेवा व्यापार संगठनहरूले पनि प्रयोग गर्न सक्ने टेलिकमको दाबी छ ।

मौसम अपडेटको लागि मेट्रोलोजी विभाग, यात्रा जानकारीको लागि यात्रा एजेन्सी, उडान जानकारीका लागि एयरलाइन्स कार्यालय र ट्राफिक अपडेटका लागि ट्राफिक प्रहरी कार्यालयले यो सेवा प्रयोग गर्न सक्नेछन् ।

टेलिकमले मुद्रा विनिमय केन्द्र र विदेशी मुद्रा दरको सूचना दिने प्रयोजनका लागि बैंक र अन्य एजेन्सीहरूले पनि यसको प्रयोग गर्न सकिने जनाएको छ ।

त्यस्तै कार्यक्रम तालिकाका लागि एफएम रेडियो/टिभी स्टेशन, ताजा समाचारका लागि समाचार एजेन्सी, राशिफलका लागि ज्योतिषी, फिल्म हल, शिक्षा सम्बन्धि परामर्श केन्द्र र अस्पताल र पोलिक्लिनकहरूले पनि यसको प्रयोग गरेर फाइदा लिन सक्नेछन् ।

यो सेवा लिन ग्राहकले एउटा फारम भरेर यसलाई ०१-४२२७७७७ मा फ्याक्स गर्नुपर्नेछ । अथवा आवश्यक कागजातसहितको अनुरोध पत्र [email protected] पनि इमेल गर्न सकिने टेलिकमले जनाएको छ । साथै उक्त फारमसँग प्यान र कार्यालय दर्ता पत्रको प्रतिलिपि अनिवार्य संलग्न गर्नुपर्छ । 

यस्तो सूचना रेकर्डिङका लागि नेपाल टेलिकमको जीएसएम वा फिक्स्ड फोन प्रयोग गर्नुपर्छ ।

अनि १६१०-एरिया कोड-अडियो सूचना बोर्ड सेवाको लागि सदस्यता लिएको टेलिफोन नम्बर डायल गर्नुपर्छ । जस्तै काठमाडौँको एरिया कोड छ भने १६१०-०१४२४१*** डायल गर्नुपर्छ । अनि सूचना बोर्ड सेवाको लागि फारम भर्दा अनुरोध गरे अनुसार ६ अङ्कको पासवर्ड राख्नुपर्छ ।

यसलाई सुन्नको लागि नेपाल टेलिकमले उपलब्ध गराएको नोटिसबोर्ड नम्बर डायल गर्नुपर्छ । जस्तै १६१८-एरिया कोड-टेलिफोन नम्बर ।

अडियो सूचना सुन्न देशभरका नेपाल टेलिकम नेटवर्क भित्र रहेका सबै प्रकारका फोनको प्रयोग गर्न सकिन्छ ।