सर्वोच्च अदालतले झापामा रहेको दुर्गा प्रसाईंको बी एण्ड सी मेडिकल कलेजलाई सम्बन्धन दिन आदेश दिएको छ ।

न्यायाधीश डा. कुमार चूडाल र सारंगा सुवेदीको संयुक्त इजलासले सोमवार बीएण्डसीलाई सम्बन्धन दिन आदेश दिएको हो ।

प्रसाईंको माग अनुसार सम्बन्धन दिन आदेश दिएको सर्वोच्चका सह प्रवक्ता गोविन्द अधिकारीले लोकान्तरलाई जानकारी दिए ।​

आशय पत्र दिएर पनि सम्बन्धन नदिएको भन्दै प्रसाईंले चिकित्सा शिक्षा आयोग सानोठिमी लगायतविरुद्ध प्रसाईंले २०७७ असार २१ गते सर्वोच्चमा रिट दायर गरेका थिए । 

प्रसाईंको कलेजलाई सम्बन्धन नदिन माग गर्दै डा. गोविन्द केसीले पटक-पटक अनशन गरेका थिए ।

केसीले प्रसाईंलाई मेडिकल माफियाको संज्ञा दिँदै बीएण्डसीलाई सम्बन्धन दिन नहुने माग राख्दै आएका छन् ।

मेडिकल कलेज सञ्चालन गर्न भन्द्र प्रसाईंले झापाको विर्तामोडमा अत्याधुनिक उपकरणसहितको अस्पताल संचालनमा ल्याएका छन् । ​​

बैंकबाट ऋण लिएर संरचना स्थापित गरे पनि आफ्नो मेडिकल कलेजलाई सम्बन्धन नदिइएपछि प्रसाईं राजनीतिक दलका नेताविरुद्ध आक्रामक अभिव्यक्ति दिँदै आइरहेका छन् ।