लुम्बिनी विकास कोषको हाताभित्र बनाइएका बिहारहरूमा पर्यटक, धार्मिक पर्यटक वा तीर्थयात्रीका नाममा गरिँदै आएको होटल व्यवसाय अविलम्ब बन्द गर्न माग राख्दै यहाँका व्यवसायीले आन्दोलन शुरू गरेका छन् ।

गुरुयोजना क्षेत्रका बिहार तथा गुम्बामा पर्यटक राख्ने व्यवस्था अविलम्ब स्थायी रुपमा रोक लगाउन माग गर्दै लुम्बिनी होटल संघ नेपालले कोषविरुद्ध आन्दोलन शुरू गरेको हो ।

संघले ‘गरी खान देउ’ भन्ने नाराका साथ आन्दोलन थालेको अध्यक्ष गोविन्दप्रसाद ज्ञवालीले बताए । आन्दोलनका कार्यक्रमअन्तर्गत बिहीवारदेखि अनिश्चितकालीन धर्ना शुरू गरिएको छ ।

माग पूरा नभएसम्म कोषको कार्यालय प्रांगणमा शान्तिपूर्ण धर्नासहितका विभिन्न कार्यक्रम गरिने अध्यक्ष ज्ञवालीले बताए ।

‘तीन दिनसम्म दिनको दुई घण्टा शान्तिपूर्ण धर्ना र त्यसपछि समय बढाउँदै लैजाने तयारी छ,’ उनले भने, ‘लुम्बिनीमा उपलब्ध हुन सक्ने विद्धत वर्गलाई सम्मिलित गरी प्रा केन्जो टाँगेले तयार गरेको गुरुयोजनामाथि छलफल, विमर्श गरी सम्बन्धित मन्त्रालयहरूमा निचोड बुझाइने छ ।’ 

बिहारहरूमा पर्यटक राख्नेगरी सयौं कोठा बनाइएकोमा संघको आपत्ति छ ।  बिहार र गुम्बा बौद्ध आध्यात्मिकता र बौद्ध भावनाको नमूना नभइ व्यापारको थलो बनेकोमा अध्यक्ष ज्ञवालीले चिन्ता व्यक्त गरे ।

‘समस्या समाधानको माग गर्दै गत फागुन २९ गते सात दिनको समय दिएर ज्ञापनपत्र बुझाइएको थियो । तर अघिल्ला वर्षहरूजस्तै बिहारहरूलाई एक–एक थान पत्र बुझाउनुबाहेक कुनै ठोस कदम चालिएन,’ उनले थपे ।

संघका महासचिव पुरुषोत्तम अर्यालले नियमविपरीत बिहारमा होटल व्यवसाय सञ्चालन गरेको कार्यविरुद्ध १२ वर्षदेखि आफूहरू लड्दै आएको र हालसम्म मागको सुनुवाइ नभएको गुनासो गरे ।