भारतका चार प्रदेशमा भारी वर्षाका कारण ठूलो क्षति भएको छ । असाम, पश्चिम बंगाल, मणिपुर र मिजोरममा अचानक आएको आँधी र वर्षाका कारण ठूलो जनधनको क्षति भएको भारतीय सञ्चार माध्यमहरूले जनाएका छन् । 

पश्चिम बंगालको जलपाईगुडीमा ५ जनाको मृत्यु भएको छ भने करिब पाँच सय जना घाइते भएका छन् । घाइतेलाई अस्पताल भर्ना गरिएको छ । जसमध्ये कम्तीमा २० जनाको अवस्था गम्भीर रहेको समाचारमा उल्लेख छ । 

गुवाहाटी विमानस्थलको छानाको एक भाग भत्किएको छ । मिजोरमको चम्फई जिल्लामा एउटा चर्चको भवन भत्किएको छ भने मणिपुरको थौबलमा धेरै घरमा क्षति पुगेको छ ।

भारी वर्षाका कारण असमको गुवाहाटीस्थित गोपीनाथ बोर्दोलोई अन्तर्राष्ट्रिय विमानस्थलमा ठूलो क्षति पुगेको बीबीसी हिन्दीले जनाएको छ । विमानस्थलको छानाको एक भाग भत्किएको छ । केही समय उडान अवरुद्ध भएको थियो । ६ वटा उडान डाइभर्ट गर्नुपरेको थियो ।

मणिपुरको थौबल र खोङजोम क्षेत्रमा धेरै रुखहरू उखेलिएका छन् र घरका टिनका छानाहरू उडेका छन् । पश्चिम बंगालको जलपाईगुडीमा भारी वर्षा, असिना र आँधीले घर, भवन र बालीनालीमा ठूलो क्षति पुर्याएको छ।