नेपाली कांग्रेसका केन्द्रीय सदस्य रामकृष्ण यादवले गृहमन्त्री रवि लामिछानेले गोरखा मिडियामा शेयर लगानी गरेको पैसाको सम्बन्धमा अनुसन्धान गर्नुपर्ने बताएका छन् ।

मंगलवार प्रतिनिधि सभा बैठकको शुरूमै सभामुखसँग समय लिएर सांसद यादवले टीभीमा गरेको लगानीको स्रोतबारे अनुसन्धान गर्नु पर्ने बताएका हुन् । 

‘माननीय गृहमन्त्री लामिछाने गोरखा मिडियाको सञ्चालक र प्रबन्ध निर्देशक हुनुहुन्थ्यो । सहकारीबाट तपाईंको संस्थामा ८० करोड पैसा आएको छ, व्यक्तिगत कमाइको पैसा होइन होला, कसैले दान दिएको पैसा होइन होला, अमेरिकाबाट ल्याएको पनि होइन होला’, यादवले भने, ‘के यत्रो पैसा नाफामूलक संस्थाले सहकारीबाट लिन मिल्छ ? मिल्दैछ । तपाईंको संलग्नताको पर्याप्त आधार छ ।’

रास्वपाका नेता एवं श्रम मन्त्री डीपी अर्याल ‘हाम्रो कृषि सहकारी संस्था’को अध्यक्ष हुँदा निक्षेप कर्ताले ४ करोड नपाएको उनको दाबी छ ।

‘अचम्मको कुरा अस्वाभाविक रूपमा गोर्खा मिडियाका अध्यक्ष जीबी राईलाई भित्र्याइएको छ । यसले पुष्टि गरेको छ–सहकारीको ठगी संजाल कसरी फैलिरहेको छ’, यादवले भने । 

यसअघि ग्यालेक्सी टीभीमा रविले लगानी गरेको तथ्य बाहिरिएको थियो ।

लामिछानेको सम्बन्धमा संसदीय छानबिनको माग गर्दै यादवले यसमा सहयोग नगरे सहकारी ठगी आरोपले जीवनभर लखेट्ने चेतावनी दिए ।