लुम्बिनी प्रदेशका मुख्यमन्त्री डिल्लीबहादुर चौधरीले पदबाट राजीनामा दिएका छन् । सदन ‘फेस’ गर्न नसकेपछि उनले बिहीवार प्रदेशसभा बैठकलाई​ सम्बोधन गर्दै राजीनामा दिएका हुन् । 

राजीनामा दिनुअघि चौधरीले आफ्नो दल नेपाली कांग्रेसका प्रदेश पदाधिकारी, सरकारका मन्त्री र प्रदेशसभा सदस्यहरूसँगको छलफल गरेका थिए । संघमा फेरिएर बनेको नयाँ ‘मिलिजुली’ गठबन्धन बनेपछि मुख्यमन्त्री चौधरी अल्पमतमा परेका थिए । ५३ सांसदको समर्थनमा चौधरी गत वैशाख १४ गते मुख्यमन्त्री बनेका हुन् । दाङ क्षेत्र नम्बर ३ (क)बाट निर्वाचित सांसद चौधरी कांग्रेस संसदीय दलको नेता हुन् । 

चौधरीले राजीनामा दिएसँगै लुम्बिनीमा नयाँ सरकार बन्ने बाटो खुलेको छ । नयाँ गठबन्धनबाट नेकपा (माओवादी केन्द्र)का संसदीय दलका नेता जोखबहादुर महरा मुख्यमन्त्री बन्दै छन् । 

प्रधानमन्त्री पुष्पकमल दाहाल प्रचण्डको सचिवालयमा रहेर लामो समय काम गरेका उनी रोल्पा क्षेत्र नम्बर १ (क) बाट निर्वाचित सांसद हुन् । महरा यसअघि नेकपा (एमाले)का नेता लीला गिरी नेतृत्वको सरकारमा अर्थमन्त्री बनेका थिए । 

८७ सदस्यीय लुम्बिनी प्रदेशसभामा बहुमतका लागि ४४ सांसदको समर्थन चाहिन्छ । लुम्बिनीमा एमालेका २९, कांग्रेसका २७, माओवादी (सभामुखसहित) ११, राष्ट्रिय प्रजातन्त्र पार्टी (राप्रपा) का र नागरिक उन्मुक्तिका ४/४, जनमत पार्टी, जनता समाजवादी पार्टी (जसपा) र लोकतान्त्रिक समाजवादी पार्टी (लोसपा)का ३/३, जनमोर्चा र नेकपा  (एकीकृत समाजवादी)का १/१ र एकजना स्वतन्त्र सांसद छन् ।  राप्रपाका एकजना सांसद भ्रष्टाचार अभियोगमा निलम्बनमा परेका छन् । 

महराले एमाले, माओवादी, जसपा, नागरिक उन्मुक्ति, एकीकृत समाजवादी र एकजना माओवादीनिकट स्वतन्त्र प्रदेशसभा सदस्यलाई समेटेर सरकार बनाउने तयारी गरेका छन् । 

संसद्मा सम्बोधन गर्दै उनले अहिलेको अवस्था हामीलाई संघीयता रहने र नरहने अवस्था सिर्जना भएको बताए । फोटो झुण्ड्याउनका लागि मात्र संघीयता आएको उनको गुनासो थियो । प्रदेशले औचित्य पुष्टि गर्न नसकेको उनले टिप्पणी गरे ।