उपप्रधान तथा गृहमन्त्री रवि लामिछाने र काठमाडौं महानगरपालिकाका प्रमुख (मेयर) बालेन शाहबीच भेटवार्ता भएको छ । गृहमन्त्री लामिछानेलाई भेट्न मेयर शाह बुधवार सिंहदरबारस्थित गृह मन्त्रालयमा गएका थिए । तर उनीहरूबीचको भेटका तस्वीर भने बिहीवार मात्र सार्वजनिक भएका छन् ।

दुईबीच बुधवार भेट भएको मेयर शाहका सचिवालयका एक सदस्यले लोकान्तरलाई जानकारी दिए ।

गृहमन्त्री लामिछाने र मेयर शाहबीच न्युरोडमा फूटपाथ बनाउने योजना, ठमेल २४ सै घण्टा खुला गर्ने विषय र सुकुम्बासी समस्या समाधानलगायतका मुद्दामा कुराकानी भएको जनाइएको छ ।

बुधवार दिउँसो काठमाडौं महानगरको सहकारी विभागले गृहमन्त्रीपत्नी निकिता पौडेल आबद्ध साई स्वागत सहकारीमा छापा मारेको थियो । यसबीचमा दुईबीच भेटवार्ता हुनुलाई अर्थपूर्ण रुपमा हेरिएको छ ।