वर्षाले काठमाडौं उपत्यकाको वायुमण्डलमा रहेको धुवाँ-धुलोको मात्रा केही घटाएको छ । काठमाडौंमा बिहीबार हल्का वर्षा भएको थियो । केही दिनदेखि वायु प्रदूषणको चपेटामा रहेको काठमाडौंमा वर्षा र हावाहुरीले केही राहत मिलेको हो । 

तुवाँलोले छोपेको आकाशमा डढेलोको धुँवा मिसिँदा जनजीवन निकै प्रभावित भएको थियो, तर हावाहुरीले धुलो–धुवाँ बढारेको छ भने पानीले पखालिदिएको छ । 

वर्षाले काठमाडौंको वायु प्रदूषण घटेको आइक्यु एयर इन्डेक्सले जनाएको छ । रियल टाइममा मापन गर्ने वायु शुद्धता सूचकांकअनुसार अहिले नेपालमा विश्वका प्रदूषित शहरमध्ये काठमाडौं चौथो स्थानमा छ ।

अहिले बिहान ७ बजे काठमाडौंको प्रदूषणको अवस्था एक्यूआई १६६ छ । भारतको राजधानी दिल्ली पहिलो स्थानमा र चीनको बेइजिङ शहर दोस्रो स्थानमा छ । दिल्लीको एक्यूआई २१४ र बेइजिङको १९७ छ ।

बंगलादेशको राजधानी ढाकाको प्रदूषणको अवस्था एक्यूआई १७९ छ ।

१५१ देखि २०० एक्यूआईलाई ‘अस्वस्थकर’ मानिन्छ । २०१ देखि ३०० सम्म एक्यूआईलाई अत्यन्तै अस्वस्थकर मानिन्छ।

एक्यूआईले हावामा हुने पीएम २.५ र पीएम १० भनिने सूक्ष्म कणलाई हेरेर प्रदूषणको तह निर्धारण गर्छ । 

वन तथा भूसंरक्षण विभागका अनुसार विगत ६ दिनयता देशभर १३८ स्थानमा डढेलो लागेको थियो । जसका कारण वायुमण्डलमा प्रदूषित बन्न पुगेको हो ।

डढेलोका कारण वायुमण्डलमा परेको असरले श्वासप्रस्वासमा समस्या हुने गरेको चिकित्सकहरू बताउँछन् । वायुमण्डलमा हुने ‘एयर क्वालिटी इन्डेक्स’ को मात्रा बढ्दा मानव स्वास्थ्य नराम्रोसँग प्रभावित भइरहेको भरतपुर अस्पतालका फिजिसियन डा. प्रतीक न्यौपानेले बताए ।

वायु प्रदूषणका कारण बालबालिकामा दमको समस्या देखापर्न सक्ने डा प्रतीक न्यौपानेले बताए । वायुमण्डलमा भएको प्रदूषणका कारण मुख तथा नाक सुक्खा हुने हुँदा नियमित पानीको सेवन गर्ने, झोलिलो पदार्थ सेवन गर्ने, माक्स लगाएर मात्रै घरबाहिर निस्कनेलगायत उपाय अपनाउन सकिने उनको सुझाव छ ।