नेपाली कांग्रेसका सांसद रामहरि खतिवडाले प्रतिनिधिसभाका सबै बैठकमा उपस्थित हुने सांसदको नाम अधिवेशन अन्त्यमा पढ्न संसद् बैठकमा प्रस्ताव गरेका छन् ।

आइतवार अधिवेशन अन्त्यको दिन लगातार १० बैठकमा अनुपस्थित सांसदको हाजिरी स्वीकृति गराउने बेलामा सांसद खतिवडाले त्यस्तो प्रस्ताव गरेका हुन् । 

‘१० बैठकमा अनुपस्थित हुनेको मात्र होइन, अधिवेशनको सबै बैठकमा उपस्थित हुने सांसदको नाम पनि पढ्ने परिपार्टी शुरू गरौं,’ उनले भने । 

जवाफमा सभामुख देवराज घिमिरेले यस विषयमा पछि छलफल गर्ने बताए । 

‘माननीयले राखेको विषय ध्यानाकर्षण भएको छ, के गर्ने हो पछि गरौंला,’ घिमिरेले भने । खतिवडा प्रतिनिधिसभामा लगातार उपस्थित हुने सांसद हुन् ।