'लोकान्तर राउण्ड अप'मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ-
सुदूरपश्चिम प्रदेशका प्रमुख नजिर मियाँसमक्ष नागरिक उन्मुक्ति पार्टी (नाउपा)का दुई प्रदेश सभा सदस्यले आइतबार छुट्टाछुट्टै रुपमा प्रदेशको मुख्यमन्त्रीमा नियुक्तिको दाबी पेस गरेका छन् ।

प्रदेश सभाको ठूलो दल नेपाली कांग्रेस, नागरिक उन्मुक्ति पार्टी र नेपाल कम्युनिस्ट पार्टी (एकीकृत समाजवादी) पार्टी संसदीय दलका नेताको हस्ताक्षरसहितको समर्थनमा नाउपाका प्रदेश सभा सदस्य लक्ष्मणकिशोर चौधरीले मुख्यमन्त्रीमा दाबी पेस गरेका हुन् ।

केही समयपछि सोही पार्टीका अर्का प्रदेश सभा सदस्य कैलाश चौधरीले केन्द्रीय गठबन्धनअनुसार नेपाल कम्युनिस्ट पार्टी (माओवादी केन्द्र) नेकपा (एमाले) र नाउपाको समर्थनमा मुख्यमन्त्रीमा दाबी पेस गरेका हुन्। 

 लक्ष्मणकिशोरलाई मुख्यमन्त्री नियुक्ति गर्नमा प्रदेश सभामा रहेका राप्रापाका एक सदस्यको पनि समर्थन रहेको जनाइएको छ ।
००००
विधेयक अधिवेशनको रूपमा चिनिने संघीय संसद्को हिउँदे अधिवेशनमा प्रतिनिधिसभाले जम्मा ३ वटा विधेयक मात्र पारित गरेको छ । २०८० माघ २२ गते शुरू भइ २०८१ वैशाख २ गते समापन भएको अधिवेशनले ३ वटा कानून बनाएको हो । 

७० दिन चलेको अधिवेशनमा २३ दिनमा २३ पटक बैठक बसी ८१ घण्टा ५५ मिनेट संसदीय काममा व्यतित गरेको थियो । अधिवेशनबाट अनुगमन तथा मूल्याङ्कन विधेयक २०७६, खाद्य सुरक्षा तथा गुणस्तर विधेयक २०७७ पारित भएका छन् । 

यस्तै ‘सम्पत्ति सुद्धीकरण (मनी लाउन्डरिङ) तथा व्यावसायिक वातावरण प्रवद्र्धनसम्बन्धी केही नेपाल ऐनलाई संशोधन गर्ने विधेयक’ राष्ट्रियसभाबाट भएको संशोधनलाई स्वीकार गरी विधेयक पारित भएको छ ।
००००
नेकपा एमालेले नयाँ सत्ता समीकरणले मुलुकलाई सही दिशामा लैजान थालेको निष्कर्ष निकालेको छ ।  पार्टी कार्यालय च्यासलमा आइतवार बसेको सचिवालय बैठकले नयाँ सत्ता समीकरणले मुलुकलाई सही दिशामा ल्याउन सफल भएको निष्कर्ष निकालेको हो ।

बैठकपछि उपमहासचिव प्रदीप ज्ञवालीले सरकारले जनतालाई अझ विश्वास जगाउने काममा गति ल्याउनुपर्ने बताएका हुन् । एमाले सचिवालय बैठकले वैशाख ८ र ९ गते हुने राष्ट्रिय महाधिवेशन प्रतिनिधि परिषद् बैठकको कार्यसूचीसमेत तय गरेको छ ।
००००
चालू वसन्तयाममा म्याग्दीमा रहेका धवलागिरि र अन्नपूर्ण हिमाल आरोहणका लागि ४० जनाले अनुमति लिएका छन् ।

धवलागिरि गाउँपालिका–४ मा रहेको विश्वको सातौं (८,१६७ मिटर) अग्लो धवलागिरि हिमाल चढ्न १५ र अन्नपूर्ण गाउँपालिका–४ मा रहेको (८०९१ मिटर) अग्लो अन्नपूर्ण प्रथम हिमाल आरोहणका लागि २५ जनाले अनुमति लिएका पर्यटन विभागले जनाएको छ ।
००००
सर्वोच्च अदालतले नागरिक उन्मुक्ति पार्टी (नाउपा)की सुदूरपश्चिम प्रदेश सभा सदस्य इन्दिरा गिरीलाई पदमुक्त गर्ने निर्णय तत्काल कार्यान्वयन नगर्न आदेश गरेको छ ।

न्यायाधीश प्रकाशमान सिंह राउतको एकल इजलासले सदस्य गिरीलाई प्रदेश सभा सदस्यको हैसियतमा काम–कारबाही गर्न रोक लगाई पदमुक्त गने निर्णय तत्काल कार्यान्वयन नगर्न अन्तरिम आदेश गरेको हो ।
००००
विश्वको सर्वोच्च शिखर सगरमाथाको नाम अङ्ग्रेजीमा पनि सगरमाथा नै राख्न सरोकारवाला विज्ञहरुले सुझाव दिएका छन् । 

सगरमाथालाई अङ्ग्रेजीमा ‘माउन्ट एभरेष्ट’ उल्लेख गर्ने गरिएकोप्रति आपत्ति जनाउँदै विज्ञहरूले यस्तो सुझाव दिएका हुन् ।

इतिहास शिरोमणि बाबुराम आचार्य स्मृति प्रतिष्ठानले आइतबार गरेको सञ्चारकर्मीसँगको अन्तरक्रियामा उनीहरूले नेपालका अन्य हिमालको नाम नेपालीकरण मात्र रहेको जस्तै सगरमाथाको नाम पनि एउटै हुनुपर्ने तर्क गरेका हुन् ।
००००
सरकारले एकैपटक ५ जना सचिवको सरुवा गरेको छ । चैत ३० गते शुक्रवार बसेको मन्त्रिपरिषद् बैठकले ५ जना सचिवको सरुवा गर्ने निर्णय गरेको हो ।
जसअनुसार प्रधानमन्त्री तथा मन्त्रिपरिषद्को कार्यालयका सचिव दिनेश भट्टराईलाई महिला बालबालिका तथा जेष्ठ नागरिक मन्त्रालयमा सरुवा गरिएको छ ।
००००
प्रमुख प्रतिपक्षी दल नेपाली कांग्रेसले सरकारी ठगीमा जोडिएका मन्त्रीबारे प्रश्न उठ्न थालेपछि संसद्को अधिवेशन अन्त्य गरिएको आरोप लगाएको छ । अधिवेशन अन्त्य गर्ने सरकारको निर्णयप्रति कांग्रेसले निन्दा र भर्त्सना गरेको छ । 

आइतवार बसेको कांग्रेस संसदीय दलको बैठकले सदनमा उठेका प्रश्नबाट भागेर सरकार भाग्ने काम गरेको निष्कर्ष निकालेको हो । सरकारले संसदीय मूल्य–मान्यताको बर्खिलाप गरेको निष्कर्ष बैठकले निकालेको कांग्रेस संसदीय दलका प्रमुख सचेतक रमेश लेखकले जानकारी दिए ।
०००००
क्रिप्टो करेन्सीमार्फत कारोबार तथा सट्टेबाजी गराएको आरोपमा ३ जना पक्राउ परेका छन् । पक्राउ पर्नेमा सर्लाहीका सञ्जयकुमार साह, रामजी साह र राकेश चौधरी छन् ।

उनीहरूलाई सर्लाहीबाट पक्राउ गरेर काठमाडौं ल्याइएको काठमाडौं उपत्यका अपराध अनुसन्धान कार्यालयका प्रमुख एसएसपी सोमेन्द्रसिंह राठौरले जानकारी दिए ।