नेपाल वायुसेवा निगमले अन्तर्राष्ट्रिय उडानका लागि खरिद गरिएका न्यारोबडी र वाइडबडी जहाजको चैतको किस्ता र ब्याज गरी ५३ करोड भुक्तानी गरेको छ ।

निगमका प्रवक्ता रमेश पौडेलले सोमवार एक विज्ञप्ति जारी गर्दै २ वटा वाइडबडीको आंशिक र २ न्यारोबडी जहाजको चैत महिनाको किस्ताबापत पूरा रकम भुक्तानी गरिएको जानकारी दिए । 

'अन्तर्राष्ट्रिय उडानका लागि खरिद गरिएका दुई न्यारोबडी र दुई वाइडबडी जहाजको लागि कर्मचारी सञ्चय कोष र नागरिक लगानी कोषबाट लिएको ऋण दायित्वमध्ये न्यारोबडीको २०८० चैत महिनाको किस्ताबापत पूरा र वाइडबडीको आंशिक गरी ५३ करोड ९ लाख ५५ हजार २८१ रकम भुक्तानी गरेको छ,' विज्ञप्तिमा भनिएको छ ।

उक्त विज्ञप्तिमा निगमको वर्तमान नेतृत्वले व्यवस्थापन सम्हालेपश्चात निगमले हालसम्म ५ अर्ब ३६ करोड ६६ लाख ८६ हजार ९६८ रुपैयाँ किस्ता रकम भुक्तानी गरेको जानकारीसमेत दिइएको छ ।

निगमले कोभिडका कारण व्यापारमा प्रतिकूल असर परेको बताउँदै सो अवधिको ब्याज, हर्जाना र पेनल छुट गरी सहयोग गरिदिनसमेत आग्रह गरेको छ । 

'विश्वव्यापी कोरोना भाइरसको कारण निगमको व्यापारमा समेत प्रतिकूल असर परेको छ,' विज्ञप्तिमा भनिएको छ, 'सो अवधिको ब्याज, हर्जाना र पेनल छुट गरी सहयोग गरिदिन निगमले कर्मचारी सञ्चय कोष र नागरिक लगानी कोषलाई अनुरोध पत्र पठाएको र यस सम्बन्धमा छलफल समेत भइरहेको छ ।'