उल्भ्सलाई २–० ले पराजित गर्दै आर्सनल फेरि इंग्लिस प्रिमियर लिग फूटबलको शीर्ष स्थानमा उक्लिएको छ ।

शनिवार राति भएको खेलमा लियोनार्दो ट्रोसार्डले पहिलो हाफको अन्त्यतिर गोल गरेपछि आर्सनलले अग्रता लिएको थियो । यसपछि कप्तान मार्टिन ओडगार्डले दोस्रो गोल थपेर जीत सहज बनाए । यो जीतपछि आर्सनलको ७४ अंक भएको छ र यो दोस्रोमा झरेको साविक विजेता म्यानचेस्टर सिटीमाथि एक अंकको अग्रता हो ।

युरोपेली च्याम्पियन्स लिगको क्वार्टरफाइनलबाट बाहिरिएको आर्सनललाई यो जीतले राहत दिएको छ ।

शनिवारकै अन्य खेलमा ब्रेन्टफोर्डले लुटन टाउनलाई ५–१ ले हरायो भने बर्नलीले सेफिल्ड युनाइटेडमाथि ४–१ को जीत निकाल्यो ।