नेकपा (एमाले)का पूर्वउपाध्यक्ष भीम रावलले शनिवारदेखि गोदावरीमा जारी राष्ट्रिय महाधिवेशन प्रतिनिधि परिषद्को बैठकमा आफूलाई निम्तोसम्म नआएको गुनासो गरेका छन् ।

पूर्वउपप्रधानमन्त्रीसमेत रहेका रावलले हालै एउटा टेलिभिजन अन्तर्वार्तामा बैठकबारे आफूलाई जानकारीसमेत नदिएको जानकारी दिँदै यसले दुःख लागेको बताएका हुन् ।

उनले एमालेको नेतृत्वले आफूमाथि बेवास्ता गरिरहेको र ‘पार्टी छोडेर जाहोस्’ भन्ने चाहिरहेको आरोप लगाए । यसैको परिणामस्वरुप आफूलाई महाधिवेशन प्रतिनिधि परिषद् बैठकमा जानलाई परिचयपत्रसमेत नबनाइदिइएको पनि उनले खुलासा गरे । 

गत २०७८ सालमा भएको महाधिवेशमा केपी शर्मा ओलीले सर्वसम्मत अध्यक्ष हुने प्रयास गरेका थिए । तर रावलले उम्मेदवारी दिएर त्यसलाई विफल बनाएका थिए । त्यसयता आफू पार्टीमा झनै पेलिएको रावलको विश्लेषण छ । 

शनिवारबाट शुरू भएको सत्तारुढ दल एमालेको राष्ट्रिय महाधिवेशन प्रतिनिधि परिषद्को बैठक आज सकिँदैछ । 

ललितपुरको गोदावरीस्थित सनराइज सभाहलमा आजसम्म चल्ने उक्त बैठकमा दुई हजार ७३ महाधिवेशन परिषद् सदस्यसहित दुई हजार ४५४ जना सहभागी रहेको एमालेले जनाएको छ । 

शनिवारको बैठकमा एमाले अध्यक्ष केपी शर्मा ओलीले राजनीतिक प्रस्ताव प्रस्तुत गरेका थिए । यसपछि महासचिव शंकर पोखरेलले सांगठनिक प्रतिवेदन पेश गर्ने कार्यक्रम छ । 

बैठकमा मिसन ग्रासरुट, झुलाघाट चिवाभञ्याङ सङ्कल्पयात्राको समीक्षा गर्दै त्यसका आधारमा पार्टीलाई कसरी अगाडि बढाउने भन्ने निष्कर्ष निकाल्ने महासचिव पोखरेलले बताए । 

यस्तै एमालेले नेपाल कम्युनिस्ट पार्टी स्थापनाको ७५ वर्ष पूरा भएको अवसर पारेर वैशाख १० गते हीरक महोत्सव मनाउन लागेको छ । 

एमालेको समारोहमा प्रचण्ड र देउवाले सम्बोधन गर्ने