उपप्रधान एवं गृहमन्त्री रवि लामिछानेले आफूमाथि लागेको सहकारी ठगी प्रकरणमा जवाफ दिन थालेका छन् ।

चुनावी प्रचारमा मंगलवार इलाम क्षेत्र नम्बर २ पुगेका रविलाई जनताले सहकारी प्रकरण के हो ? भनेर सोधेको प्रश्नमा उनले आफू निर्दोष रहेको जवाफ दिए ।

जनताले सहकारी प्रकरणबारे स्पष्ट पार्न भनेपछि उनले सहकारीमा बचत गरेको जनताको पैसा जसरी पनि फिर्ता गरिने बताए। 

इलामको चुलाचुलीमा मंगलवार आयोजित चुनावी सभामा लामिछानेले कानून बनाएर वा संशोधन गरेर भए पनि जनताको पैसा फिर्ता हुने वातावरण सरकारले बनाउने बताए ।

उपनिर्वाचनमा पार्टीका उम्मेदवार मिलन लिम्बूको पक्षमा मत माग्न इलाम २ मा बाक्लै उपस्थित जनाउन थालेपछि रविमाथि मतदाताले प्रश्न उठाउन थालेका थिए ।

बुधवार इलामको सदरमुकाम चोक बजारमा उनले अन्तिम चुनावी सभा गर्दैछन् ।​

इलाम बजारका मतदाता अस्थिर रहेको सूचना संकलनसमेत गरेका गृहमन्त्री लामिछानेलाई यहीका मतदाताले प्रश्न गर्न थालेपछि उनी तर्केर हिँड्ने गरेका थिए ।​

पार्टीका उपसभापतिसमेत रहेका प्रतिनिधि सभा सदस्य स्वर्णिम वाग्लेलाई समेत बजार क्षेत्रका मतदाताले सभापतिप्रति प्रश्न उठाएर र्‍याखर्‍याखती पार्ने गरेका छन् ।