नेपाली कांग्रेसका सांसद टेकबहादुर गुरुङको निलम्बन फुकुवा भएको छ ।

संघीय संसद्‌ सचिवालयका महासचिव पद्मप्रसाद पाण्डेयले प्रतिनिधि सभा सदस्य गुरुङको निलम्बन फुकुवा गरिएको जानकारी दिए ।​

अख्तियार दुरुपयोग अनुसन्धान आयोगले गुरुङविरुद्ध विशेष अदालतमा भ्रष्टाचार मुद्दा दायर गरेपछि उनी निलम्बनमा परेका थिए ।

भ्रष्टाचार मुद्दाको अन्तिम टुंगो नलाग्दासम्म स्वतः निलम्बनमा रहने कानूनी व्यवस्थाअनुसार उनलाई संसद् सचिवालयले २०७९ पुष १२ गतेदेखि निलम्बन गरेको थियो ।

तर सर्वोच्च अदालतले उक्त निर्णय तथा सोको आधारमा गरिएको पत्राचारहरू उत्प्रेषणको आदेशले बदर गरिदिएको थियो ।

उक्त ब्यहोराको आदेशसहितको जानकारी २०८१ वैशाख १० गते  प्राप्त भएकाले सोहीअनुसार गुरुङको निलम्बन फुकुवा गरिएको संसद् सचिवालयले जनाएको छ ।