सगरमाथा आरोहणका क्रममा एक केन्यालीको मृत्यु

बिनाअक्सिजन सगरमाथा आरोहण गर्ने क्रममा केन्याका आरोही जोसुआ चेरियट किरुईको मृत्यु भएको छ । बुधबार राति साढे १० बजे सगरमाथा चुचुरोनजिकै (८ हजार ८३० मिटर) उनी मृत अवस्थामा भेटिएका हुन् । 

पर्यटन मन्त्रालयद्वारा जारी विज्ञप्तिमा भनिएअनुसार ‘एसएसटी एभरेस्ट एस्पिड २०२४ स्प्रिङ टिम २’ पर्वतारोहण दलका ४० वर्षीय आरोही सेभेन समिट ट्रेकमार्फत सगरमाथा चढ्न गएका थिए । 

‘किरुई विनाअक्सिजन आफ्ना नेपाली माउन्टेन गाइड सोलुखुम्बुका ङवाङ शेर्पाका साथमा १८ मेका दिन आधार शिविरबाट दोस्रो आधार शिविरतर्फ प्रस्थान गरेका थिए । उनीहरू १९ मेका दिन दोस्रो शिविरमा बसेर २० मेमा तेस्रो शिविर पुगेका थिए,’ विज्ञप्तिमा भनिएको छ, ‘२१ मेका दिन चौथो शिविर पुगेका उनीहरू २२ मे (बुधबार) बिहान सगरमाथा चुचुरोतर्फ लागेका थिए ।’ 

आरोही र सहयोगी सगरमाथा नजिकै पुगेपनि आरोहण गरे–नगरेकोबारे यकिन नभएको विभागले जनाएको छ । बुधबार दिउँसो ९ बजेसम्म पनि रेडियो सम्पर्कमा नआएपछि सेभेन समिटले चारजना अनुभव माउन्टेन गाइड परिचालन गरी क्याम्प २ माथि खोजतलास गरेको विज्ञप्तिमा उल्लेख छ । 

खोजतलासका क्रममा राति साढे १० बजे केन्याका आरोही केरुईको शव भेटिएको विभागले जनाएको छ । केरुईसँगै गएका सहयोगी शेर्पाको भने अझै खोजी जारी रहेको र अवस्थासमेत अज्ञात रहेको विभागले जनाएको छ ।