कुलमान घिसिङलाई कार्यकारी राष्ट्रपति बनाउन माग गर्दै काठमाडौंमा प्रदर्शन गरिएको छ । 

नेपाल विद्युत प्राधिकरणबाट बर्खास्तमा परेका घिसिङलाई अब कार्यकारी राष्ट्रपति बनाउनुपर्ने मागसहित उनका समर्थकहरूले प्रदर्शन गरेका हुन् । 

सरकारले प्राधिकरणको कार्यकारी निर्देशकबाट हटाउने निर्णयलाई चुनौती दिँदै घिसिङ सर्वोच्च अदालत गुहार्न पुगेका थिए । तर, अदालतले उनका पक्षमा अन्तरिम आदेश दिन अस्वीकार गर्‍यो ।

अदालतले अन्तरिम आदेश दिन अस्वीकार गरेको भोलिपल्ट पत्रकार सम्मेलन गर्दै घिसिङ सरकारमाथि खनिएका थिए । 

कुलमानका समर्थकहरूले भने सरकारको निर्णयको विरोध गर्दै दिनहुँजसो प्रदर्शन गरिरहेका छन् । सरकारले उनीमाथि प्रतिशोध साँधेको उनीहरूको आरोप छ । 

यही चैत ११ गतेको मन्त्रिपरिषद् बैठकले कुलमानलाई पदमुक्त गरेर हितेन्द्रदेव शाक्यलाई प्राधिकरणको कार्यकारी निर्देशक नियुक्त गरेको थियो ।