काठमाडौंमा जारी शिक्षकहरूको आन्दोलनमा आइतबार झडप भएको छ । 

यसअघि शान्तिपूर्ण प्रदर्शन गर्दै आइरहेका शिक्षकहरूले आइतबार निषेधित क्षेत्र तोड्ने प्रयास गरेपछि प्रहरीसँग झडप भएको हो ।

शिक्षकहरूले निषेधित क्षेत्र तोड्न खोजेपछि प्रहरीले पनि बल प्रयोग गरेको छ । बल प्रयोगपछि शिक्षकहरूले प्रहरीमाथि ढुंगामुढा प्रहार गरेका छन् । 

प्रहरीले आन्दोलनकारीमाथि पानीको फोहरासमेत प्रयोग गरेको छ । यसक्रममा एक दर्जनभन्दा बढी शिक्षक घाइते भएका छन् । 

शिक्षा ऐन जारी गर्नुपर्ने लगायतका विभिन्न माग राखेर देशभरका सामुदायिक विद्यालयका शिक्षक गत चैत २० गतेदेखि काठमाडौंमा आन्दोलनरत छन्।