०७ साउन २०८३, बिहीबार
नेकपा (एकीकृत समाजवादी)का अध्यक्ष माधवकुमार नेपाल विशेष अदालतमा उपस्थित भएका छन् ।
पतञ्जली जग्गा हिनामिना प्रकरणमा अख्तियार दुरुपयोग अनुसन्धान आयोगले दायर गरेको मुद्दामा बयानका लागि बुधबार बिहान उनी अदालतमा उपस्थित भएको विशेष अदालतका सूचना अधिकारी यज्ञराज रेग्मीले लोकान्तरलाई जानकारी दिए ।
गोविन्द बन्दीलगायत कानून व्यवसायीलाई साथमा लिएर नेपाल बिहान ११ बजे अदालत पुगेका हुन् । वरिष्ठ अधिवक्ता शम्भु थापालगायतले नेपालको पक्षमा बहस गर्ने तयारी गरेका छन् ।
अख्तियारले विशेष अदालतमा मुद्दा दायर गरेकै दिन नेपालले कानूनी परामर्श गरेका थिए । उपस्थित वकिलहरूले मुद्दा दर्ता भइसकेको अवस्थामा अदालतमा गएर प्रतिवाद गर्न सुझाव दिएका थिए ।
गत जेठ २२ गते नेपालसहित ९३ जनाविरुद्ध अख्तियारले भ्रष्टाचार मुद्दा दायर गरेको थियो । नेपालविरुद्ध १८ करोड ५८ लाख ५० हजार रुपैयाँ बिगो कायम गरिएको छ ।
नेपाल प्रधानमन्त्री हुँदा हदबन्दी छुटमा जग्गा किनेको र छुट पाएपछि दुई महिनालगत्तै हाउजिङ कम्पनीलाई बेचेपछि अख्तियारले अनुसन्धान गरेको थियो ।
योगगुरु रामदेवको योगपीठले छुटमा पाएको जग्गा काभ्रे बनेपाको साँगामा हाउजिङ कम्पनीलाई बेचिएको हो । नेपालकै निर्णयपछि ५ सय ९३ रोपनी जग्गा खरिद गरेर ३ सय ५३ रोपनी हाउजिङ कम्पनीलाई बिक्री गरिएको थियो ।
यसै प्रकरणमा नेपालमाथि अख्तियारले छानबिन गर्दै बयान लिएको थियो । १८ माघ २०६६ मा नेपालले मन्त्रिपरिषद् बैठकबाट जग्गा खरिदको निर्णय गराएका थिए ।
दुई महिनालगत्तै २०६६ चैत ६ गते बेन्च स्वीकृति दिएको निर्णय मन्त्रिपरिषद्बाट गरिएको थियो ।
