०३ साउन २०८३, आइतबार
भारतको छत्तीसगढको बीजापुर जिल्लामा १३ जना कट्टर नक्सलवादीले आत्मसमर्पण गरेका छन् ।
राज्यका उपमुख्यमन्त्री विजय शर्माले यस उपलब्धिको श्रेय प्रदेश सरकारद्वारा सञ्चालित योजनालाई दिएका छन्, जसको प्रभावले राज्यमा परिवर्तनको नयाँ वातावरण सिर्जना भइरहेको बताइएको छ।
‘यो आत्मसमर्पण प्रदेश सरकारको आत्मसमर्पण तथा पुनर्वास नीति–२०२५’ र ‘नियद नेल्ला नार योजना’को प्रत्यक्ष सफलता हो । यस योजनाका कारण नक्सल प्रभावित क्षेत्रहरूमा विश्वास र रूपान्तरणको नयाँ लहर फैलिएको छ’, उपमुख्यमन्त्री शर्माले भनेका छन्, ‘राज्यमा अहिले कानूनको शासन छ । अघिल्लो सरकारका पालामा प्रहरीले नै मनोबल गुमाएको थियो, तर हाम्रो सरकारले त्यो विघटित व्यवस्थामा सुधार गरिरहेको छ ।’
यसैबीच, कांग्रेस पार्टीका अध्यक्ष मल्लिकार्जुन खडगेको छत्तीसगढ भ्रमणलाई लिएर उपमुख्यमन्त्री शर्मासँग प्रतिक्रिया मागिएको छ । कांग्रेसले खडगेको भ्रमणलाई ‘संजीवनी’सरह मानेको बताइरहेको छ ।
त्यसबारे टिप्पणी गर्दै शर्माले भने, ‘खडगेले सनातन परम्पराको अपमान गर्छन्, त्यसैले म उनको आलोचना गर्छु । उनको आगमनबाट राज्यलाई कुनै लाभ हुने छैन । छत्तीसगढका जनताले उनलाई स्वागत गर्नेवाला छैनन् । कांग्रेसमा संजीवनी आउने कि नआउने भन्ने कुरा त कांग्रेसकै नेताहरूले ठम्याउने कुरा हो । उनको आगमनले के हुन्छ, त्यो म भन्न सक्दिनँ ।’
प्रदेशमा पहिलोपटक भारतीय जनता पार्टी (भाजपा)ले ठूलो स्तरमा तीनदिने प्रशिक्षण शिविरको आयोजना गर्न लागेको छ । यो कार्यक्रम आगामी जुलाई ७ देखि ९ सम्म सञ्चालन हुने छ । तर, कांग्रेसले यस कार्यक्रमलाई ‘पर्यटन’को संज्ञा दिँदै आलोचना गरेको छ ।
यसबारेमा उपमुख्यमन्त्री शर्माले भने, ‘कांग्रेसलाई लाग्छ उनीहरूले सबै पढिसकेका छन् । प्रशिक्षण शिविर संगठन सुदृढ बनाउन समय–समयमा गरिनु सामान्य कुरा हो । कांग्रेस यसलाई पर्यटन भन्छ भने त्यो उनीहरूको सोच हो । तर, उनीहरूले विगतका सरकारमा भएको कोइला घोटालाको चिन्ता गर्नुपर्छ । रक्सी घोटालालगायतका धेरै अनियमितताबारे पनि गम्भीर हुन जरुरी छ ।’
