०२ साउन २०८३, शनिबार
श्रीलंकाका पूर्वराष्ट्रपति रनील विक्रमसिंघेलाई त्यहाँको अपराध अनुसन्धान विभाग (सीआईडी)ले पक्राउ गरेको छ ।
राष्ट्रपति हुँदा गरेका विदेश भ्रमणसम्बन्धी छानबिनको बयान दिन सीआईडी कार्यालय पुगेका उनलाई शुक्रबार बिहान नियन्त्रणमा लिइएको हो ।
पछि उनलाई कोलम्बोको कोट्टे महादेव अदालतमा उपस्थित गराइएको छ भने अदालत परिसरमा कडा सुरक्षा व्यवस्था मिलाइएको छ ।
यसअघि नै सीआईडीले सो प्रकरणमा अनुसन्धान अघि बढाएको थियो । गत जुन २४ मा अदालतमा प्रारम्भिक प्रतिवेदन बुझाइएको थियो ।
उपलब्ध विवरणअनुसार, २०२२ जुलाई २० देखि २०२४ सेप्टेम्बर २३ सम्मको दुई वर्षभन्दा कम अवधिमा राष्ट्रपति रहेका विक्रमसिंघेले २३ वटा विदेश भ्रमण गरेका थिए । ती भ्रमणहरूमा ६ अर्ब रुपैयाँभन्दा बढी खर्च भएको बताइएको छ ।
यो विषयमा भइरहेको अनुसन्धान र अदालतको निर्णयलाई अहिले श्रीलंकाको राजनीति र सार्वजनिक चासोका रूपमा हेरिएको छ ।
