०२ साउन २०८३, शनिबार
पूर्व प्रधानन्यायाधीश सुशीला कार्कीले शुक्रबार राति अन्तरिम सरकारको प्रधानमन्त्री पदमा शपथग्रहण गरेकी छिन् । जेनजी पुस्ताको आन्दोलनपछि प्रधानमन्त्री केपी शर्मा ओलीले राजीनामा गरेपछि कार्की आजै प्रधानमन्त्रीमा नियुक्त भएकी थिइन् ।
राष्ट्रपति रामचन्द्र पौडेलले अन्तरिम सरकारको प्रधानमन्त्रीमा नियुक्त गरेको केहीबेरमै कार्कीले पद तथा गोपनियताको शपथ लिएकी हुन् । राष्ट्रपति कार्यालय शीतलनिवासमा आयोजित एक कार्यक्रमका बिच कार्कीले शपथ लिएकी हुन् ।
जेनजी पुस्ताले भदौ २३ र २४ गते गरेको प्रदर्शन भएको थियो । यही विरोध प्रदर्शनपछि नयाँ चुनावी सरकारको कोर्समा देश अगाडि बढेको हो ।
लामो समय संसद् विघटन गरेपछि मात्रै प्रधानमन्त्रीमा शपथ लिने अडानमा बसेकी थिइन् । तर नियुक्तिपछि संसद् विघटन गर्न तयार भएपछि उनलाई राष्ट्रपति पौडेलले शपथ गराएका हुन् ।
राष्ट्रपतिका सल्लाहकार पोखरेल पनि कार्कीको नियुक्तिपछि बस्ने मन्त्रिपरिषद्को बैठकको सिफारिस संसद् विघटनसहितका प्रक्रिया अगाडि बढ्ने समझदारी भएको बताएका छन् । ‘उहाँको शपथ हुने र त्यसपछि क्याबिनेटनले संसद् विघटन र निर्वाचनसम्बन्धी निर्णय गर्नेछ पोखरेलले लोकान्तरसँग भने ।
स्रोतका अनुसार राष्ट्रप्रति पौडेलले नयाँ प्रधानमन्त्रीले संसद् विघटनको सिफारिस गर्नुपर्ने र मन्त्रिपरिषद्को पहिलो बैठकमै चुनावको मिति घोषणा हुनुपर्ने अडान राखेका थिए । यो अडानमा मान्दै कार्की प्रधानमन्त्री बन्न तयार भएकी हुन् ।
राष्ट्रपति पौडेल, जेनजी समूहका प्रतिनिधि र दलहरूबिच औपचारिक अनौपचारिक संवाद भएपछि कार्कीलाई प्रधानमन्त्री बनाउने बाटो खुलेको हो । यो समझदारीमा कांग्रेसका नेताहरूले असन्तुष्टि जनाएका छैनन् । तर एमाले महासचिव शंकर पोखरेलसहितका नेताले संसद् विघटन गर्न खोजिएकोप्रति आपत्ति जनाएका छन् ।
७३ वर्षीया कार्की मुलुकको पहिलो महिला प्रधानमन्त्री बनेकी हुन् । उनी २०७४ जेठसम्म १४ महिना सर्वोच्च अदालतको प्रधानन्यायाधीश बनेकी थिइन् ।
