थाइल्यान्डमा जारी एएफसी महिला यू–१७ एसियन कप छनोटमा फूटबल प्रतियोगिताको आफ्नो दोस्रो खेलमा शुक्रबार नेपाली टोली आयोजक राष्ट्रसँग ०–१२ गोलको विशाल अन्तरले पराजित भएको छ ।

फराकिलो हारसँगै नेपाली टोलीको आगामी एएफसी एसियन कप खेल्ने सपना पनि समाप्त भएको छ ।

चोनबुरी रंगशालामा खेलको प्रारम्भदेखि नै थाइल्यान्डले नेपाली टोलीविरुद्ध गोलको वर्षा शुरू गरेको थियो ।

छनोट प्रतियोगितामा नेपाल, थाइल्यान्ड र तुर्कमिनिस्तान समूह ‘एफ’ मा परेका थिए । उक्त समूहबाट थाइल्यान्ड एएफसी एसियन कपमा पुग्न सफल भयो ।

आफ्नो पहिलो खेलमा थाइल्यान्डले तुर्कमिनिस्तानलाई १७–० गोलले हराएको थियो । नेपाली टोली भने आफ्नो पहिलो खेलमा तुर्कमिनिस्तानसँग गोलरहित बराबरीमा रोकिएको थियो ।

एएफसी महिला यू–१७ एसियन कप सन् २०२६ को अप्रिल ३० देखि मे १७ तारिखसम्म चीनमा आयोजना हुँदैछ ।