पूर्वप्रधानमन्त्री शेख हसिनालाई सत्ताबाट हटाउने युवा आन्दोलनका एक प्रमुख नेताको मृत्यु भएपछि बंगलादेशमा हिंसा भड्किएको छ ।

शरीफ उस्मान हादीलाई गत साता ढाकामा एक मस्जिदबाट बाहिर निस्कँदै गर्दा मुखौटा लगाएका आक्रमणकारीहरूले गोली हानेका थिए । गम्भीर घाइते भएका हादीको सिंगापुरमा उपचारका क्रममा बिहीबार मृत्यु भएको हो ।

उक्त गोलीकाण्ड बंगलादेशी अधिकारीहरूले सन् २०२४ को जनआन्दोलनपछि पहिलो निर्वाचनको मिति घोषणा गरेको एक दिनपछि भएको थियो । हादी सो निर्वाचनमा स्वतन्त्र उम्मेदवारका रूपमा प्रतिस्पर्धा गर्ने तयारीमा थिए ।

हादीको मृत्युको खबर सार्वजनिक भएपछि बिहीबार राजधानी ढाकाको एक चोकमा उनका सयौं समर्थकहरू भेला भएर प्रदर्शन गरेका थिए ।

पछि प्रदर्शनकारीहरूले बंगलादेशका प्रमुख दैनिक पत्रिका ‘द डेली स्टार’ र ‘प्रथम आलो’का कार्यालयमा तोडफोड गरेका थिए । तीमध्ये एक भवनमा आगजनीसमेत गरिएको थियो ।

‘यहाँ सयौं मानिसहरू जम्मा भएका छन् र आक्रमण गरेका छन्’, एक प्रहरी अधिकारीले बीबीसी बंगलालाई भनेका छन् । 

घटनास्थलमा सेना परिचालन गरिएको थियो भने दमकलकर्मीहरूले भवनभित्र फसेका पत्रकारहरूको उद्धार गरेका थिए ।

३२ वर्षीय हादी विद्यार्थी आन्दोलन समूह ‘इन्किलाब मञ्च’का वरिष्ठ नेता थिए । उनी छिमेकी देश भारतका खुला आलोचकसमेत थिए, जहाँ पूर्वप्रधानमन्त्री हसिना स्वेच्छिक निर्वासनमा बसिरहेकी छन् ।

बंगलादेशका विभिन्न राजनीतिक दलहरूले हादीको मृत्युमा शोक व्यक्त गर्दै अन्तरिम सरकारलाई दोषीलाई कानूनी कठघरामा ल्याउन आग्रह गरेका छन् ।

अन्तरिम सरकारका प्रमुख तथा नोबेल पुरस्कार विजेता मोहम्मद युनुसले हादीको मृत्युलाई ‘देशका लागि अपूरणीय क्षति’ भनेका छन् ।

‘डर, आतंक र रक्तपातमार्फत् लोकतन्त्रतर्फको यात्रालाई रोक्न सकिँदैन’, युनुसले बिहीबार टेलिभिजन सम्बोधनमा भनेका छन् ।

अन्तरिम सरकारले शनिबार राष्ट्रिय शोक दिवस घोषणा गरेको छ ।

हादीमाथि गोली प्रहार भएपछि युनुसले यो पूर्वनियोजित आक्रमण भएको र ‘षड्यन्त्रकारीहरूको उद्देश्य निर्वाचन प्रक्रिया विफल पार्नु’ रहेको बताएका थिए ।

‘निर्वाचन अवरुद्ध गर्ने उद्देश्यले गरिने कुनै पनि प्रकारको हिंसा सह्य हुने छैन’, युनुसले भने, ‘यो घटना देशको राजनीतिक अवस्थाका लागि चिन्ताजनक हो ।’

घटनाको अनुसन्धान जारी छ र गोलीकाण्डसँग सम्बन्धित केही व्यक्तिहरूलाई नियन्त्रणमा लिइएको छ ।

गत वर्ष अगस्ट ५ मा विद्यार्थी नेतृत्वको आन्दोलनपछि शेख हसिना भारततर्फ भागेकी थिइन्, जससँगै उनको १५ वर्ष लामो सत्ताको अन्त्य भएको थियो ।

नोभेम्बरमा प्रदर्शनकारीमाथि घातक बल प्रयोग गर्न अनुमति दिएको अभियोगमा दोषी ठहर गर्दै हसिनालाई मानवताविरुद्धको अपराधमा मृत्युदण्डको सजाय सुनाइएको थियो । 

सो आन्दोलनका क्रममा १,४०० जनाको ज्यान गएको थियो ।