अमेरिकी राष्ट्रपति डोनाल्ड ट्रम्पले आणविक कार्यक्रममा सम्झौताका लागि वार्ता गर्ने समय छिटो सकिँदै गएको इरानलाई चेतावनी दिएका छन् । राष्ट्रपति ट्रम्पको यो बयान खाडी क्षेत्रमा अमेरिकी सैन्य बलको निरन्तर निर्माणको बीचमा आएको हो ।

विशाल अमेरिकी नौसेना बेडालाई उल्लेख गर्दै अमेरिकी राष्ट्रपतिले विशाल आर्मडा पूर्ण शक्ति, उत्साह र उद्देश्यका साथ इरानतर्फ द्रुत गतिमा अघि बढिरहेको बताए ।

जवाफमा इरानका विदेशमन्त्री अब्बास अराघचीले देशको सशस्त्र सेना जमिन वा समुद्रबाट हुने कुनै पनि आक्रमणको तत्काल र बलपूर्वक जवाफ दिन पूर्णरूपमा तयार र सक्षम रहेको बताए ।

इरानले आफ्नो आणविक कार्यक्रम पूर्णतया शान्तिपूर्ण रहेको बताएको छ । इरानले आणविक हतियार विकास गर्न खोजेको भन्ने संयुक्त राज्य अमेरिका र उसका सहयोगीहरूले लगाएको आरोपलाई बारम्बार अस्वीकार गर्दै आएको छ ।

यो नयाँ चेतावनी अघि ट्रम्पले यस महिनाको सुरुमा इरानमा भएको प्रदर्शनमाथि क्रूर दमन पछि प्रदर्शनकारीलाई सहयोग गर्न अमेरिकाले इरानमा हस्तक्षेप गर्ने वाचा गरेका थिए ।

उनले भनेका थिए,‛मद्दत आउँदैछ ।’ तर ट्रम्पले पछि आफ्नो अडान परिवर्तन गर्दै आफूले भरपर्दो स्रोतहरूबाट इरानमा प्रदर्शनकारीहरूको मृत्युदण्ड रोकिएको थाहा पाएको बताएका थिए ।

अमेरिकास्थित मानव अधिकार कार्यकर्ता समाचार एजेन्सी एचआरएएनएका अनुसार डिसेम्बरको अन्त्यतिर इरानमा विरोध प्रदर्शन सुरु भएदेखि अहिलेसम्म ६,३०१ भन्दा बढी व्यक्तिको मृत्यु भएको पुष्टि भएको छ । यसमध्ये ५,९२५ प्रदर्शनकारी थिए ।

एचआरएएनएले करिब तीन हप्तादेखि इन्टरनेट बन्द हुँदाहुँदै पनि प्राप्त १७,००० अन्य कथित मृत्युको रिपोर्टहरूको पनि अनुसन्धान गरिरहेको बताएको छ ।

यसैबीच, नर्वेली संस्था इरान मानव अधिकार आईएचआरले कुल मृत्यु हुनेको संख्या २५,००० नाघ्न सक्ने चेतावनी दिएको छ ।