पाकिस्तानको अशान्त प्रान्त बलूचिस्तानमा पछिल्लो समय हिंसात्मक गतिविधि बढेको छ। पाकिस्तानका गृहमन्त्री मोहसिन नक्वीले शनिबार बलूचिस्तानका विभिन्न क्षेत्रमा आतंकवादीहरूले गरेका ठूला हमलाहरूलाई सुरक्षा बलले सफलतापूर्वक विफल पारेको दाबी गरेका छन्।

गृहमन्त्री नक्वीका अनुसार सुरक्षा बलको समयमै र प्रभावकारी कारबाहीका कारण ३७ चरमपन्थी मारिएका छन्। यद्यपि, सोही भिडन्तका क्रममा १० जना सुरक्षाकर्मीले पनि ज्यान गुमाएका छन्। शनिबार बिहानैदेखि बलूचिस्तानको राजधानी क्वेटासहित विभिन्न सहरहरूमा विष्फोट र गोलीबारीका खबरहरू सार्वजनिक भएका थिए।

यस भीषण आक्रमणको जिम्मेवारी विद्रोही समूह बलूचिस्तान लिबरेसन आर्मी (बीएलए) ले लिएको छ। बीएलएले एक विज्ञप्ति जारी गर्दै यी हमलाहरू आफ्नो सैन्य अभियान 'अपरेशन हेरोभ' को दोस्रो चरण भएको बताएको छ।

यसैबीच, बलूचिस्तानका मुख्यमन्त्रीका सल्लाहकार शाहिद रिन्दले पछिल्लो दुई दिनमा प्रदेशका विभिन्न स्थानमा ७० भन्दा बढी चरमपन्थीहरू मारिएको दाबी गरेका छन्।