राष्ट्रिय परीक्षा बोर्डले सार्वजनिक गरेको माध्यमिक शिक्षा परीक्षा (एसईई) २०८२ को नतिजाअनुसार ४८ हजारभन्दा बढी विद्यार्थीले उच्च जीपीए हासिल गरेका छन् ।

बोर्डका अनुसार ३.६ देखि ४ जीपीए ल्याउने विद्यार्थीको सङ्ख्या ४८ हजार ३९२ रहेको छ ।

यस वर्ष देशभरबाट चार लाख ३० हजार ६६७ विद्यार्थी एसईई परीक्षामा सहभागी भएका थिए । जसमध्ये दुई लाख ८४ हजार १६० विद्यार्थी ‘ग्रेडेड’ अर्थात् उत्तीर्ण भएका छन् ।

नतिजाअनुसार ३.२ देखि ३.६ जीपीए ल्याउने विद्यार्थी ८० हजार ३७२ रहेका छन् भने २.८ देखि ३.२ जीपीए ल्याउने विद्यार्थीको सङ्ख्या सबैभन्दा बढी ९४ हजार २२२ रहेको बोर्डले जनाएको छ ।

त्यस्तै २.४ देखि २.८ जीपीए ल्याउने ५५ हजार ९७७, २ देखि २.४ जीपीए ल्याउने पाँच हजार १९० तथा १ देखि २ जीपीए ल्याउने विद्यार्थीको सङ्ख्या सात रहेको छ ।

यस वर्ष एसईईमा नियमिततर्फ सहभागी परीक्षार्थीमध्ये ६५.९८ प्रतिशत विद्यार्थी उत्तीर्ण भएका छन् भने एक लाख ४६ हजार ५०७ विद्यार्थी नन–ग्रेडेड (एनजी) मा परेका छन् ।