काठमाडौं, १४ माघ– कुष्ठरोग मुक्त समाज निर्माण, बालबालिकाहरुमा शुन्य अपाङ्गता हाम्रो अभियान भन्ने नाराका साथ आइतबार विश्व कुष्ठरोग दिवस नेपालमा पनि मनाइएको छ । 

बालबालिकाहरुमा शून्य अपाङ्गता भन्ने नारा बनाउँदै विभिन्न कार्यक्रम भएपनि  कुष्ठरोगको कारण अपाङ्गता भएकाहरुको पुनस्र्थापनामा सरकारले चासो नदिएको  कुष्ठरोग प्रभावितहरुले गुनासो गरेका छन् ।

६५ औं विश्व कुष्ठरोग दिवसको अवसरमा कुष्ठरोग नियन्त्रण महाशाखाले आइतबार टेकुमा आयोजना गरेको अन्तरक्रियामा कुष्ठरोग प्रभावित समाजका अध्यक्ष दिपक तिवारीले सरकारको आलोचना गरे । 

महाशाखाले आयोजना गरेको अन्तरक्रिया कार्यक्रमको अन्त्यमा समय माग्दै उनले आफ्नो गुनासो संचारकर्मीलाई सुनाएका थिए ।

‘नेपाल सरकारले नै ३३ हजार मानिसहरु कुष्ठरोगको कारण अपाङ्गता भएको जनाएको छ । तर ती कुष्ठरोग प्रभावितको अवस्था कस्तो छ ? कहाँ छन् ? कसरी जीवन विताइरहेका छन् सरकारसँग कुनै जानकारी छैन । 

उनले भने, ‘ कुष्ठरोग प्रभावित लागि विभिन्न सरकारी र गैरसरकारी संस्थाहरुले काम गरीरहेका छन् भन्छन् । तर कुष्ठरोग प्रभावितको अवस्था दयनीय छ । उनीहरुको जीवन कसरी वितिरहेको छ कसैलाई चासो छैन । कुष्ठरोग प्रभावितको पुनः स्थापनाको कुरा मात्रै भएको छ, काम भएको छैन ।’

उनले कुष्ठरोग महाशाखालाई कुष्ठरोग बाट अपाङ्गता भएका मानिसहरुको पुनस् स्थापनाको लागि कार्य गरिदिन आग्रह समेत गरे ।

कार्यक्रममा कुष्ठरोग नियन्त्रण महाशाखाका निर्देशक मोहम्द दाउदल कुष्ठरोग बाट प्रभावित भएकाहरुको लागि सरकारले आगामी दिनहरुमा योजना बनाएर आयआर्जनको लागि कार्यक्रमहरु गर्ने बताए ।
दिवसको अवसरमा आयोजित अन्तरक्रियामा महाशाखाका छालारोग विशेषज्ञ डाक्टर रविन्द्र बास्कोटाले कुष्ठरोगीको खोजीमा भएका अध्ययन अनुसन्धानको प्रतिवेदनहरु सार्वजनिक गरेका थिए । कुष्ठरोगीको खोज्ने क्रममा नयाँ

विरामीहरु भेटिने क्रम बढ्दै गएको डा. बास्कोटाले बताएका छन् ।

महाशाखाको तत्थ्याङ्क अनुसार नेपालमा आर्थिक वर्ष २०७३–७४ मा नयाँ विरामीको संख्या ३ हजार २ सय १५ रहेको भने २ हजार ६ सय १९ जना विरामीले उपचार गराइरहेका छन् ।  कुष्ठरोगको संक्रमण तराईका जिल्लाहरुमा बढि रहेको जनाइएको छ ।

कुष्ठरोगको कारण हालसम्म ३३ हजार जना अपाङ्गता भएको अनुमान गरीएको छ ।