सुदूरपश्चिममा डेढ लाखले स्वास्थ्य बीमा गराए

धनगढी- सुदूरपश्चिम प्रदेशमा डेढ लाख भन्दा बढी स्वास्थ्य बीमामा आबद्ध भएका छन् । २०७२ साल चैत २५ गते कैलालीबाटै शुरू भएको स्वास्थ्य बीमा कार्यक्रम सुदूरपश्चिमको ५ जिल्लामा लागू गरिएको छ । जहाँ १ लाख ६७ हजार १ सय १६ जना बिमित रहेका छन् ।

स्वास्थ्य बीमा बोर्ड सुदूरपश्चिम प्रदेश कार्यालयले सोमबार धनगढीमा पत्रकार सम्मेलगन गरी सो कुरा जनाएको हो । बोर्डका अनुसार कैलालीमा मात्रै १ लाख २ हजार ५ सय २२ जना बिमित रहेका छन् । कैलाली, बैतडी, अछाम, बाजुरा र बझाङमा कार्यक्रम जारी रहेकोमा दार्चुला र कञ्चनपुर जिल्लामा पनि बीमाको सदस्यता दर्ता शुभारम्भ भएको जनाइएको छ ।

स्वास्थ्य बीमा हालसम्म मुलुकको ४२ जिल्लामा लागू गरिएको छ । जसमा १५ लाख ७१ हजार ४ सय ८८ जना बिमित छन् । तर जुन रुपमा बीमाप्रति आकर्षण बढ्नुपर्ने हो, त्यो अनुसार आकर्षण बढ्न नसकेको बताइएको छ ।

स्वास्थ्य बीमा बोर्डको सूचीकृत सरकारी सेवा प्रदायक संस्थाहरुमा बिरामीको चाप अनुसार संघीय तथा प्रदेश सरकारले जनशक्तिको व्यवस्थापन गर्न नसक्नु, बोर्डसँगको सम्झौता अनुसार बीमा कार्यक्रममा मेसिन, एक्स–रे, अटो–एनालाइजर, तथा इसिजी मेसिनहरुबाट तालिम प्राप्त जनशक्तिको उचित व्यवस्थापन, फार्मेसी सञ्चालन र व्यवस्थापन नै बोर्डको प्रमुख समस्या र चुनौती रहेको बोर्डका कैलाली जिल्ला प्रबन्धक नरेश चौधरीले बताए ।

यी समस्या र चुनौतीको समाधान गरिए बीमाप्रति थप आकर्षण बढाउन सकिने उनले विश्वास व्यक्त गरे । यसैबीच सुदूरपश्चिम प्रदेशका सामाजिक विकास मन्त्री कृष्णराज सुवेदीले बीमाप्रति आकर्षण बढाउन देखिएका चुनौतीलाई समाधान गरिने बताए ।

स्वास्थ्य बीमाका प्रक्रिया

स्वास्थ्य बीमा गराउँदा ५ जना सदस्य बराबर १ परिवारको वार्षिक बीमा शुल्क ३ हजार ५ सय गरिएको छ भने, बिमितले वर्षभरी १ लाख रुपैयाँ बराबरको स्वास्थ्य सेवा प्राप्त गर्नेछन् । यसअघि, ५ जना सदस्य बराबर वार्षिक २ हजार ५ सय रुपैयाँ बीमा शुल्क तिर्नुपर्ने र वर्षमा ५० हजार रुपैयाँ बराबरको स्वास्थ्योपचार सेवा पाउने व्यवस्था थियो ।

अब ५ जनाभन्दा बढी सदस्य भएका परिवारले थपिएका प्रति व्यक्तिबापत थप ७ सय रुपैयाँ बीमा शुल्क तिर्नुपर्ने व्यवस्था गरिएको छ । ५ जना भन्दा बढी सदस्य भएका परिवारले प्रतिव्यक्ति २० हजारका दरले वर्षमा अधिकतम २ लाख रुपैयाँको स्वास्थ्य सेवा प्राप्त गर्न सकिने व्यवस्था गरिएको छ ।

त्यस्तै, अपाङ्गता भएका विपन्न व्यक्ति, असहायका लागि निःशुल्क स्वास्थ्य बीमा गरिने जनाइएको छ । ७० वर्षभन्दामाथिका ज्येष्ठ नागरिकले पनि १ लाख रुपैयाँ बराबरको स्वास्थ्योपचार सेवा प्राप्त गर्न सक्ने बार्डले जनाएको छ ।