धनगढी - भदौ ७, ८ र ९ गते कैलालीको टीकापुरमा हुने थरुहट/थारुवान राष्ट्रिय सम्मेलनले टीकापुरबासी उत्साहित भएका छन् ।

सम्मेलनको तयारी चलिरहेकै बेला टीकापुरबासीले नै सम्मेलनमा विभिन्न रचनात्मक कार्यक्रम तथा गतिविधि सञ्चालन गर्ने भएपछि उत्साह थपिदै गएको हो ।

विहिबार टीकापुरमा सम्मेलन आयोजक समिति र स्थानीय संवाद समिति टीकापुरबीच भएको छलफल कार्यक्रममा सम्मेलनको अवधीमा सद्भाव रक्तदान कार्यक्रम, खानेपानी र पुुष्प गुछाले सहभागी हुन आउनेलाई स्वागत गर्ने, प्रतीकात्मक रुपमा थारुको घरमा पहाडी र पहाडीको घरमा थारु समुदायका मानिसलाई बसाउँने कार्यक्रम गरिने कार्यक्रम तय भएको थारु कल्याणकारिणी सभाकी केन्द्रीय सदस्य एंव नेतृ इन्दु थारुले जानकारी दिइन् ।

संवाद समिति टीकापुुरका भैरव रावल, नेपाल रेडक्रस सोसाइटी टीकापुरका दमोदर पण्डित, स्थानीय बुद्धिजीवी भुवनेश्वर अधिकारीलगायतको अगुवाईमा भएको छलफल कार्यक्रममा स्थानीयहरुले टीकापुरको सामाजिक सद्भावलाई थप बलियो बनाउनमा प्रतिवद्ध हुनुको साथै निकै उत्साहित र संवेदनशिल भएको नेतृ थारुले बताइन् ।

छलफल कार्यक्रममा स्थानीय राजनीतिक दल, संघ संस्थाका प्रतिनिधि, पत्रकार, बृद्धिजीवीलगायतको सहभागिता रहेको थियो । सम्मेलनको तयारी अन्तिम चरणमा पुुगेको बताउदै नेतृ थारुले स्थानीय राजनीतिक दल, बडघर/भलमन्सा, सुरक्षा निकायलगायत संगको छलफल तथा सहकार्य तीव्र पारेको पनि जानकारी गराइन् ।

थरुहट/थारुवान आन्दोलनकारी र प्रहरीबीच दोहोरो झडप हुँदा २०७२ भदौ ७ गते ८ सुरक्षाकर्मी र १ नाबालक गरी ९ जनाले ज्यान गुमाएका थिए ।

भोलिपल्ट भदौ ८ गते कफ्र्यु जारी भएकै अवस्थामा थारु समुदायका घर, पसल, एफएमलगायत ८८ वटा गरी करोडौंको संरचनामाथि आगजनि भएको गरिएको थियो ।

 संविधान लेखनकै क्रममा आफूहरूको माग नसमेटिएको असन्तुष्टि पोख्दै संविधान संशोधनको मागसहितको मुद्दा अघि सार्दै थरुहट÷थारुवान संघर्ष समितिले घटना घटेको अवधिभर आगामी भदौ ७, ८ र ९ गते टीकापुरमै राष्ट्रिय सम्मेलनको तयारी अगाडी बढाएको हो ।