सिरियामा सरकारी सेनाले दिने गरेको यातनाको भयानक चित्र प्रस्तुत गर्ने प्रतिवेदन सार्वजनिक

काठमाडौं – सिरियामा गृहयुद्ध शुरू भएदेखि अहिलेसम्म सिरियाली सुरक्षाबलहरूले यातना दिएर १४ हजार मानिसको हत्या गरेको एक प्रतिवेदनमा दाबी गरिएको छ । यातना दिनका लागि झुण्ड्याइने, आँखा निकालिने र बलात्कार गरिने लगायतका काम गरिएका छन् । 

राष्ट्रपति बशिर अल–असदको सत्ताले ७२ किसिमका यातना दिने गरेको त्यसले गर्दा १७३ बालबालिका तथा ४५ महिलाको मृत्यु भएको एक नयाँ अध्ययनले देखाएको छ । 


Advertisement

सिरियन नेटवर्क फर ह्युमन राइट्सले तयार पारेको २५ पाना लामो दस्तावेजमा सिरियाली सत्ताले चलाएको थुनाकेन्द्र र सेनाले चलाएको अस्पतालमा सुनियोजित तथा व्यापक यातना दिने गरिएको उल्लेख छ । 

सन् २०११ को मार्च महिनादेखि यस वर्षको सेप्टेम्बर महिनासम्म सिरियामा यातनाका कारण कम्तीमा १४ हजार २९८ जना मारिएको उल्लेख छ । 

इस्लामिक स्टेटले यातना दिएर ५७ जनाको हत्या गरेको अनि सशस्त्र विपक्षीहरूले ४३ जनालाई मारेको प्रतिवेदनमा उल्लेख छ । 

सिरियन डेमोक्रेटिक फोर्सेसले आफ्नो नियन्त्रणमा रहेका ४३ जनाको हत्या गरेको पाइयो भने अन्य थप २० जना मृतकलाई कसले मारेको हो थाहा नभएको भेटियो । 

यातनाका लागि ७२ वटा तरिका अपनाइएको प्रतिवेदनमा उल्लेख गरिएको छ । 

पीडितको पेट र ढाडमा बेस्सरी उमालिएको पानी खन्याउने, पीडितलाई पानीमा डुबाउने र सास रोकिदिने लगायत काम भएका छन् । 

यातना दिनका लागि विद्युत् समेत उपयोग गरिएको छ । बिजुलीको रडले थुनुवाको पेट वा गुप्तांगमा झड्का दिने गरिएको छ । 

अन्यलाई क्रुसिफिक्सन भनिने विधि अपनाइएको थियो जसमा पीडितका हात र गोडालाई एउटा क्रसमा बाँधेर गुप्तांग वरिपरि कुटपिट गरिने गरिएको थियो । 

पुरुष र महिला दुवैलाई पूरै नांगिन बाध्य बनाएर एकअर्कालाई बलात्कार गर्न लगाइएको समेत पाइएको छ । 

यातनाको तरिकामा टाउको ठोकाइदिने, दाँत फुटाइदिने अनि आँखा निकालिने काम पनि गरिएको अभिलेखीकरण गरिएको थियो । हाँगाबिँगा छिमल्ने हतियारले गुप्तांग काटेको घटना पनि प्रतिवेदनमा अभिलेखीकरण गरिएको छ ।

एजेन्सी 

कमेन्ट गर्नुहोस्