आर्थिक लेनदेनमा सल्टाउन खोजिएको बलात्कारको घटना एक महिनापछि सार्वजनिक भएको छ ।

कैलालीको कैलारी गाउँपालिकामा १२ वर्षीया बालिकामाथि बलात्कार भएको घटना सार्वजनिक भएको हो ।

जिल्ला प्रहरी कार्यालय कैलालीले सोही गाउँपालिकाका ५६ वर्षीय भागीराम चौधरी विरुद्ध बालिका बलात्कारको उजुरी परेको जनाएको छ ।

आरोपितले घटना घटेको एक महिना पहिलैदेखि बालिकालाई चक्लेट र रुपैयाँ दिएर प्रलोभनमा पार्दै आएको र बलात्कार गरेको पीडित परिवारको दाबी छ । बालिकाकी बजैले भनिन् ‘नातिनी तीन दिनसम्म कोठा भन्दा बाहिर निस्कनै सकिन । पिसाब फेर्न बाहिर आउँदा हिडाइ पनि फरक देखेपछि सोधपुछ गर्दा थाहा पायौं ।’

घटनापछि थालिएकी बालिका तीन दिनसम्म भोकै बसेको परिवारजनले बताएका छन् । ‘पछि शंका लागेर पीडकको घर गएर उसको (पीडक) श्रीमतीलाई सोधपुछ गर्यौं, नातिनीलाई के भयो ? तिमीहरूको घरमा खेल्न आउँथ्यो भनेर,’ बालिकाकी बजैले घटनाको प्रकृति सुनाइन् ।

अर्को दिन पीडकको श्रीमतीले नै आफ्नै श्रीमानबाट कार्तिक ३ गते बालिका बलात्कृत भएको घटना खुलाएको बालिकाकी बजैले जानकारी दिइन् । 'उसको (पीडक) श्रीमती हाम्रो घरमा आएर बुहारी (बालिकाकी आमा) लाई भनिन्, ‘श्रीमानलाई सोधीखोजी गर्दा सबै जना खेतमा धान काट्न गएको मौका छोपेर यौन सम्पर्क गर्यो, त्यसपछि झन हामी बलियो आधार पायौं,' उनले अगाडि थपिन् ।

घटनालगत्तै दीपावली भएको कारण उनीहरू शुरूमा गाउँमै घटना मिलाउनलाई खोजेको बुझिएको छ । कुरा नमिलेपछि ईलाका प्रहरी कार्यालय हसुलियामा मंसिरको पहिलो साता ठाडो उजुरी पेश गरेको बालिकाका आफन्तले बताएका छन् ।

ईलाका प्रहरी कार्यालयबाट नहुने भएपछि मंसिर ५ गते जिल्ला प्रहरी कार्यालय कैलालीमा उजुरी दर्ता गराएको बताइएको छ । तर उजुरी दर्ता भएको एक साता पुगिसक्दा समेत प्रहरीले पीडक भनिएका चौधरीलाई अनुसन्धानको दायरामा ल्याउन नसकेको पीडित परिवारले गुनासो गरेका छन् ।

यतिमात्रै नभई पीडक पक्षले बरम्बार पैसामा मुद्धा मिलाउन दबाब दिँदै आएको बताएका छन् । पीडकका छोरा बालीराम चौधरीले डर, धम्की दिदै २ लाख २५ हजार रुपैयामा मुद्धा फिर्ता लिन भन्दै दबाब दिँदै आएको बताइएको छ ।

जिल्ला प्रहरी कार्यालय कैलालीका प्रहरी नायब उपरिक्षक दक्ष कुमार बस्नेतले घटनावारे अनुसन्धान जारी रहेको बताएका छन् । प्रहरीका अनुसार आरोपित चौधरी हाल फरार छन् । प्रहरीले आरोपितलाई कानूनी दायरामा ल्याउन नसकेपछि पीडित परिवारले प्रहरी र पीडकबीच मिलेमतोको आशंका समेत व्यक्त गरेका छन् ।