खाना पकाउने ग्यास र पेट्रोलियम पदार्थको मूल्यवृद्धिको विरोधमा विराटनगर महानगरपालिकाका निवर्तमान मेयर भीम पराजुली सडकमा उत्रिएका छन् ।

पेट्रोलियम पदार्थको मूल्यवृद्धि तत्काल फिर्ता गर लेखिएको प्लेकार्ड छातीमा टाँसेर उनले विरोध गरेका हुन् ।

उनी नेपाली कांग्रेसका केन्द्रीय सदस्य समेत हुन् । उनी आफ्नै पार्टी नेतृत्वको सरकारको विरोधमा उत्रिएका छन् ।

आफ्नै सरकार भए पनि गलत कामको विरोध गर्नु सचेत नागरिकको कर्तव्य भएको उनले बताए । ‘सरकारले गलत गर्छ भने केन्द्रीय सदस्य भए पनि गलत कामको विरोध गर्नु नैसर्गिक अधिकार हो,’ उनले भने ।

विराटनगरका सचेत नागरिकले मूल्यवृद्धिको विरोध गरेको उनले बताए । विराटनगरमै स्थानीयले १ नम्बर प्रदेशको मुख्यमन्त्री कार्यालय अगाडि खाली सिलिन्डर राखेर प्रदर्शन गरेका छन् । 

एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले पनि खाली सिलिन्डरसहित विराटनगरमा विरोध प्रदर्शन गरेको छ । विवेकशील साझा पार्टीले पनि विरोध गरेको छ ।

जेठ ८ गतेदेखि नेपाल आयल निगमले पेट्रोल, डिजेल र मट्टितेलको मूल्य प्रतिलिटर १० रुपैयाँका दरले बढाएको छ ।  खाना पकाउने ग्यासको मूल्य प्रतिसिलिन्डर २०० रुपैयाँ बढाएको छ । मूल्य बढेसँगै पेट्रोलको मूल्य प्रतिलिटर १८० रुपैयाँ, डिजेल र मट्टितेलको मूल्य १६३ रुपैयाँ पुगेको छ भने खाना पकाउने एलपी ग्यासको मूल्य प्रतिसिलिन्डर १ हजार ८०० रुपैयाँ पुगेको छ ।