नेकपा (एमाले)का अध्यक्ष केपी ओलीले विचारधारा, अर्थ राजनीतिक कार्यदिशा नभएको राष्ट्रिय स्वतन्त्र पार्टी (रास्वपा) विकल्प हुन नसक्ने टिप्पणी गरेका छन् । ललितपुरको गोदावरीमा शनिवार राष्ट्रिय महाधिवेशन प्रतिनिधि परिषद् बैठकको उद्घाटन गर्दै ओलीले यस्ता स्वार्थ समूह विकल्प बन्नै नसक्ने दाबी गरेका हुन् । 

‘पपुलिस्ट कुरा गर्नेले असन्तुष्टिको उजागर मात्रै गर्न सक्छन्, तर समाधान दिन सक्दैनन् । समाधान दिने विचार, कार्यक्रम र दृष्टिकोण भएकाले हो,’ उनले भने, ‘विचार, दर्शन र सही अर्थ राजनीतिक कार्यदिशा नभएकाहरू स्वार्थ समूह हुन् । यिनीहरूले स्वार्थभन्दा अरु हेर्दैनन् । यिनीहरू वैकल्पिक शक्ति पनि हुन सक्दैनन् ।’

एमालेबाट बाहिरिएका माधवकुमार नेपालतिर संकेत गर्दै ओलीले नेकपा (एकीकृत समाजवादी) जनताबाटै अस्वीकृत भएको बताए । 

‘कम्युनिस्ट आन्दोलन विभाजित गर्ने र वर्तमान सरकार ढाल्दै पुँजीपति वर्गको नेतृत्वमा नयाँ सरकार बनाउन खोज्ने दक्षिणपन्थी अवसरवाद नै कमजोर हुन पुगेको छ । हाम्रा पार्टीकाविरुद्धमा प्रयोग गर्न खोजिएको प्रयोग अन्ततः जनमतबाटै अस्वीकृत हुँदै पराजित हुन पुगेको छ ।’

ओलीले आफ्नो संसद् विघटनको कदमलाई प्रगिगमनको संज्ञा दिइएपनि यस्तो भाष्य झुटमा सीमित भएको दाबी पनि गरे । 

नेपाली कांग्रेसको जनाधार खस्किएको भन्दै ओलीले अब एमाले नै बलियो शक्तिको रुपमा स्थापित भएर जाने बताए ।