हावाहुरीसहितको वर्षाले वायु प्रदूषण घट्यो, विश्वकै पहिलो प्रदूषित शहर काठमाडौं पुग्यो ​१२ औं स्थानमा

सोमवारदेखिको हावाहुरी र वर्षाले काठमाडौं उपत्यकालगायत मुख्य शहरको वायु प्रदूषण घट्न थालेको छ ।

‘एयर क्वालिटि इन्डेक्स’ को आजको तथ्याङ्कअनुसार समग्र वायु गुणस्तर सूचकाङ्क (एक्यूआई) ८९ मा झरेको छ ।

सो तथ्याङ्क अनुसार मङ्गलवार दिउँसो भने गुणस्तर सूचकांक (एक्यूआई) एक सय २७ सम्म पुगेको थियो भने गत शनिवार एक सय ९२, आइतवार एक सय ७६, सोमवार एक सय ५६ पुगेको वायु प्रदूषण घटेर आज ८९ मा झरेको हो।

एक साताअघि काठमाडौं विश्वकै पहिलो प्रदूषित शहरको रूपमा सूचीकृत भएकामा आज भने घटेर १२ औं स्थानमा उक्लिएको छ।

आज भारतको राजधानी दिल्ली विश्वकै पहिलो प्रदूषित शहरका रूपमा सूचीकृत भएको छ । दिल्लीको वायु गुणस्तर सूचकाङ्क (एक्यूआई) एक सय ५९ पुगेको छ ।

जसलाई अस्वस्थ वायु मानिन्छ । यसैगरी विश्वको दोस्रो प्रदूषित सहरमा आज कङ्गो छ । त्यहाँको वायु गुणस्तर सूचकाङ्क (एक्यूआई) एक सय ५२ पुगेको छ । ​​​

डढेलोविद् सुन्दर शर्माले लामो समयसम्म वर्षाका कारण मुलुकको विभिन्न स्थानमा लागेको वन डढेलो पनि नियन्त्रण हुँदै गएपछि वायु प्रदूषण न्यूनीकरणमा सहयोग पुगेको बताए ।

वन डढेलोका कारण वायु प्रदूषण बढ्ने भएकाले वर्षाअघि ह्वात्तै बढेको प्रदूषण पनि कम हुँदै गएको उनको भनाइ छ ।

विपत व्यवस्थापनविद् डा धर्मराज उप्रेती पनि अझै केही दिन वर्षा हुने भएकाले वायु प्रदूषण पनि कम हुँदै जाने बताउँछन् ।

उनका अनुसार शून्यदेखि ५० सम्मको वायु गणुस्तर एक्युआई राम्रो (हरियो संकेत) मानिन्छ ।

५१ देखि एक सयसम्मको एक्युआईलाई होसियार रङ्ग अथवा पहेंलो संकेत, एक सय एकदेखि एक सय ५० सम्मलाई अस्वस्थ मान्ने गरिएको छ, जसले स्वासप्रसास र मुटु रोगका बिरामीलाई असर गर्छ भन्ने बुझिन्छ ।

त्यस्तै, एक सय ५१ देखि दुई सय सम्मको एक्युआईले सबैलाई असर गर्ने, दुई सय एकदेखि तीन सयलाई धेरै अस्वस्थ र सोभन्दा माथि चार सयलाई खतरनाक र  चार सयदेखिमाथि चार सय ५० लाई धेरै खतरा मान्ने गरिएको उप्रेतीले बताए ।

नेपाल सरकारले निर्धारण गरेको काठमाडौं उपत्यकाको वायु गुणस्तर व्यवस्थापन कार्ययोजना, २०७६ ले पनि एक्युआईको मान तीन सयभन्दा बढी भएको अवस्थालाई विपद्को रूपमा लिने बताएको छ ।

वायु प्रदूषण रोक्न फोहोर बाल्ने कार्य रोक्ने, सडक सफा गर्न ब्रमुर तथा भ्याकुमको प्रयोग व्यापक गर्ने, बालबालिका, ज्येष्ठ नागरिक, बिरामीहरूलाई विशेष सावधानी अपनाउन सार्वजनिक सूचना जारी गर्नुपर्ने सोही कार्ययोजनामा उल्लेख छ ।