काठमाडौं– नेपाली कांग्रेसका सांसद एवं पूर्व गृह राज्यमन्त्री देवेन्द्रराज कंडेलले कञ्चनपुरकी बालिका निर्मला पन्तको हत्या सिंहदरबारका जनप्रतिनिधिको संरक्षणमा भएको आरोप लगाएका छन् । 

मंगलवार बसेको प्रतिनिधि सभा बैठकको विशेष समयमा कंडेलले निर्मला हत्या प्रकरण पञ्चायतको समयमा पोखरामा भएको नमिता–सुनिता हत्या काण्डजस्तै भएको टिप्पणी गरेका हुन् । 

‘२०३८ सालमा पोखरामा नमिता–सुनिता हत्या काण्ड भएको थियो, दरवार र श्रीपेचको आडमा त्यो घटना लुकाइयो’ कंडेलले भने, ‘विना श्रीपेचका सिंहदरबारका जनप्रतिनिधिको आडमा कञ्चनपुर घटना भएको महसूस गरेको छु ।’ 

उनले निर्मला हत्या प्रकरणमा गृहमन्त्री रामबहादुर थापाले दिएको सार्वजनिक अभिव्यक्ति समेत आपत्तिपूर्ण रहेको बताए । ‘निर्मला हत्या जस्ता घटना विगतमा पनि भएका थिए, आज पनि छन्, भविष्यमा पनि हुनसक्छन् भन्ने ? यदि गृहमन्त्रीको यही ठहर हो भने निर्मला जस्तै घटना तपाईंको परिवारमा भएको भए तपाईंको अभिव्यक्ति यही हुन्थ्यो ? गृहमन्त्रीले यो अभिव्यक्ति फिर्ता लिनुपर्छ भन्ने मेरो माग छ,’ कडेलले भने ।

उनले गृहमन्त्रीको अभिव्यक्तिले नेपालीको शिर निहुरिएको बताए । 

कंडेलको अभिव्यक्तिप्रति नेकपाकी सचेतक शान्ता चौधरीले नियमापत्ति गर्न खोजिन् । नियमापत्ति शब्द उच्चारण नगरी उनले भनिन्– ‘सिंहदरबारबाट घटाइएको भन्ने कुरा उहाँजत्तिको मान्छेले भन्न मिल्छ सभामुख महोदय ? यो शब्द रेकर्डबाट हटाउनु पर्छ ।’

कांग्रेस सांसदको भनाइमा सत्तारुढ दलकी सांसदले जवाफ फर्काएपछि कांग्रेसका मीनबहादुर विश्वकर्माले नियमापत्तिमाथि नियमापत्ति गरे । ‘संसदमा एक माननीय बोलेको बेला अर्को माननीयले जवाफ दिएर जुहारी गराउन मिल्छ ?’ विश्वकर्माले सभामुखसँग प्रश्न गरे । 

जवाफमा सभामुख कृष्णबहादुर महराले भने, ‘नियमापत्ति नै हो माननीय ज्यू !’

महराले थपे, ‘माननीयजीले बोलेको विषयमा मेरो ध्यानाकर्षण भएको छ । यसलाई के गर्ने मैले निर्णय गर्छु ।’