विद्यार्थीको रिहाइ माग गर्दै नेपाल विद्यार्थी संघ (नेविसंघ) कास्कीले जिल्लामा अनिश्चितकालीन शैक्षिक हड्तालको घोषणा गरेको छ ।

नेविसंघले फागुन १५ गतेदेखि लागू हुने गरी अनिश्चितकालीन शैक्षिक संस्था बन्द आह्वान गरेको हो ।

सोही क्रममा नेविसंघले मंगलवार पोखरामा कुनै पनि सरकारी गाडी चल्न दिएको छैन । आन्दोलनका क्रममा बगरस्थित पृथ्वीनारायण क्याम्पस अगाडि विद्यार्थी र प्रहरीबीच झडप भएको छ ।

प्रहरीको कुटपिटबाट विद्यार्थी सुजन तिमिल्सिना घाइते भएको नेविसंघका नेता विक्रमादित्य सिंह गिरीले बताए । आन्दोलनका क्रममा विद्यार्थीले ५ वटा सरकारी गाडी नियन्त्रणमा लिएका छन् ।

नेविसंघका नेता एवं स्ववियु सभापति पदका उम्मेदवार रेशम हमाल ‘राजेश’लाई प्रहरीले २ दिनअघि नियन्त्रणमा लिएको थियो । क्याम्पस हाताभित्रैबाट प्रशासनको मिलेमतोमा उनलाई पक्राउ गरी र झूटा मुद्दा लगाइएको भन्दै तत्काल मुद्दा खारेज गरी रिहाइ गर्न माग गरिएको नेविसंघ पीएन क्याम्पस इकाइ सभापति दीपक शर्मा वाग्लेले बताए ।

नेविसंघले पूर्व सञ्चारमन्त्री गोकुल बाँस्कोटालाई कडा कारबाही गर्नुपर्ने र प्रधानमन्त्री केपी शर्मा ओलीले केकमा नेपालको नक्सा बनाएको भन्दै माफी माग्नुपर्ने माग समेत गरेको छ ।

पीएन क्याम्पसमा यतिखेर नेविसंघ र अनेरास्ववियुको सांगठनिक मतभेदका कारण शैक्षिक गतिविधि असहज बन्दै गएको छ ।