गण्डकी प्रदेशको सुरक्षा अवस्था सुदृढ पार्न सुरक्षा निकायका प्रमुख पोखरामा भेला भएका छन् ।

गण्डकी प्रदेशस्तरीय सुरक्षासम्बन्धी गोष्ठी उद्घाटन गर्दै गृहमन्त्री रामबहादुर थापाले कालापानी र लिपुलेक समेटेर छिट्टै नेपालको नक्सा सार्वजनिक गरिने दाबी गरे । 

उनले सीमा विवाद् अन्त्यका लागि भारतीय पक्ष पनि छलफल सकारात्मक भएको उल्लेख गर्दै सो कुरा बताए । उनले नेकपा पार्टीभित्रको विवाद बाहिर आएजस्तो नभएको दाबी गर्दै राष्ट्रियसभा सदस्यमा उपाध्यक्ष वामदेव गौतम नै मनोनित हुने बताए । 

गृहमन्त्री थापाले पार्टीभित्रको विवादलाई लिएर राजनीतिक विश्लेषकले गरेको मध्यावधि चुनावको आकलन सही नहुने भन्दै तत्काल चुनाव नहुने स्पष्ट पारे । उनले पार्टीभित्र अन्तरकलह र विमति भइरहन्छन् तर त्यो सहमति आधारमा टुंगिने बताए ।

सुरक्षासम्बन्धी गोष्ठीले गण्डकी प्रदेशको समग्र सुरक्षा अवस्था र भावी दिनमा अपनाउनुपर्ने रणनीति, जिल्लाका सुरक्षा चुनौती, समीक्षा र भावी योजना एवं रणनीति तयार गर्नेछ ।

गोष्ठीमा व्यवसायमा एकाधिकारको अवस्था, सुशासनका लागि गर्नुपर्ने कार्य तथा सुरक्षासम्बन्धी सम्बन्धमा छलफल हुने गण्डकी प्रदेशका आन्तरिक मामिला तथा कानूनमन्त्री हरिबहादुर चुमानले जानकारी दिए ।

२ दिने गोष्ठीमा नेपाल प्रहरीका महानिरीक्षक ठाकुरप्रसाद ज्ञवाली, सशस्त्र प्रहरी बलका महानिरीक्षक शैलेन्द्र खनाल, राष्ट्रिय अनुसन्धान विभागका प्रमुख अनुसन्धान निर्देशक गणेश अधिकारी, गृहसचिव महेश्वर न्यौपाने, गण्डकी प्रदेशका मुख्यमन्त्री पृथ्वीसुव्वा गुरुङ, विभिन्न मन्त्री, गण्डकी प्रदेशका प्रमुख सचिव हरिप्रसाद बस्याल, नेपाली सेना मध्यपृतना हेडक्वार्टरका पृतनापति गोकुल भण्डारी, गृह मन्त्रालयका प्रवक्ता तथा सुरक्षा तथा समन्वय शाखाका प्रमुख केदारनाथ शर्मा, उच्चपदस्थ कर्मचारी, गण्डकी प्रदेशका ११ वटै जिल्लाका प्रमुख जिल्ला अधिकारी लगायत ८० जनाको सहभागिता छ ।